Жаңалықтар

Шу ауданында кәріз құдығын жөндеу кезінде екі адам қаза тапты

14.07.2026

мин

0

70

Сурет: SN.kz

Шу ауданында кәріз құдығын жөндеу кезінде екі адам қаза тапты, — деп хабарлайды Dauletten.kz.

Жамбыл облысы Шу ауданында аурухана аумағындағы кәріз құдығында болған қайғылы оқиға еңбек қауіпсіздігі мәселесін тағы да күн тәртібіне шығарды. Алдын ала мәлімет бойынша, кәріз жүйесін жөндеуге түскен сантехник құдық ішінде жиналған газға уланып, көмекке шақырған.

Оның жанайқайын естіген зертхана қызметкері әріптесін құтқару үшін еш ойланбастан тереңдігі шамамен үш метр болатын құдыққа түскен. Алайда ол да улы газдың әсерінен есінен танып қалған. Кейін екі азаматты алып шығуға үшінші қызметкер әрекет жасағанымен, ол да құдықтан өздігінен шыға алмай қалған.

Салдарынан алғашқы екі адам оқиға орнында көз жұмды. Ал үшінші болып құдыққа түскен сантехник аман қалып, жансақтау бөліміне жеткізілді. Дәрігерлер оның жағдайын бақылауда ұстап отыр.

Бұл оқиға көпшілік елемейтін, бірақ аса қауіпті қауіптің бар екенін көрсетті. Кәріз құдықтарында көзге көрінбейтін улы газдардың жиналуы бірнеше минуттың ішінде адам өміріне қауіп төндіруі мүмкін. Мамандар мұндай орындарға арнайы газталдағыш құралдарсыз және қорғаныс жабдықтарынсыз түсуге болмайтынын бірнеше рет ескерткен.

Аталған дерек бойынша полиция ҚР Қылмыстық кодексінің 156-бабының 4-бөлігі – абайсызда екі немесе одан да көп адамның өліміне әкеп соққан еңбекті қорғау қағидаларын бұзу фактісі бойынша сотқа дейінгі тергеуді бастады. Қазір оқиғаның барлық мән-жайы анықталып, жауапты тұлғалардың әрекетіне құқықтық баға беріледі.