Жаңалықтар

«Таза Қазақстан»: Алматы жастары Бутақты шатқалына тазалық жұмыстарын жүргізді

31.07.2026

мин

0

70

Сурет: «Таза Қазақстан» акциясы барысынан

Алматыдағы Бутақты шатқалында «Таза Қазақстан» жалпыұлттық бастамасы аясында ауқымды экологиялық сенбілік ұйымдастырылды. Табиғи аумақты тазартуға 800-ден астам жас қатысып, қоршаған ортаны қорғауға өз үлесін қосты, — деп хабарлайды Dauletten.kz.

Алматының Жетісу ауданында жастардың қатысуымен экологиялық акция өтті. 31 шілдеде Бутақты шатқалында ұйымдастырылған сенбілікке ауданның демалыс орталықтарында тәрбиеленіп жатқан жастар мен жастар ұйымдарының өкілдері қатысты.

Шараны жастар ұйымдарынан құралған «Менің таңдауым» коалициясы ұйымдастырды. Экологиялық акция барысында 800-ден астам белсенді жас шатқал аумағын тұрмыстық қалдықтардан тазартуға атсалысты.

Қатысушылар бірлесіп еңбек етіп, табиғи аумақтарды таза ұстаудың маңызын көрсетті. Сенбілік кезінде экологиялық мәдениетті қалыптастыру, қоршаған ортаға жауапкершілікпен қарау және табиғи нысандарды ұқыпты пайдалану мәселелеріне басымдық берілді.

Ұйымдастырушылардың айтуынша, мұндай бастамалар жастарды қоғамдық пайдалы жұмыстарға тартумен қатар, олардың табиғатқа деген жанашырлығын арттыруға мүмкіндік береді. Бір күндік сенбілік аясында жастар қоршаған ортаны қорғау ісіне нақты үлес қосты.

Шара барысында қатысушылар жастардың қоғамдық өмірге белсенді араласуының маңызын да атап өтті. Олар азаматтық жауапкершілікті арттырып, қоғамдық бастамаларға тұрақты түрде атсалысуға шақырды.

Экологиялық сенбілік жастардың ұйымшылдығын көрсетіп, табиғатты қорғау мәдениетін қалыптастыруға бағытталған бастамалардың маңызын тағы бір мәрте көрсетті.