|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Италияның қос шаһары — Милан мен Кортина-д’Ампеццо төрінде өткен XXV қысқы Олимпиада ойындары мәресіне жетті. 17 күнге созылған дүбірлі додада әлемнің 94 елінен келген 2917 спортшы 16 спорт түрі бойынша 116 жүлде жиынтығын сарапқа салды. Қазақстан құрамасы бұл бәсекеде тарихи жетістікке қол жеткізді, - деп хабарлайды Dauletten.kz.
Төрт жылда бір рет өтетін қысқы спорт мерекесіне 94 мемлекеттен 2917 атлет қатысып, 16 спорт түрі бойынша бақ сынасты. Биылғы бәсеке тартыс пен рекордтарға толы болды.
Қазақстан құрамасы бұл Олимпиадада 10 спорт түрінен 36 спортшымен өнер көрсетті. Ел қоржынына тарихи жетістік сыйлаған — мәнерлеп сырғанаушы Михаил Шайдоров. Ол қысқы Олимпиада ойындарында алтын медаль жеңіп алып, отандық мәнерлеп сырғанау тарихында жаңа белеске көтерілді.
Сонымен қатар бірқатар қазақстандық спортшылар үздік ондыққа еніп, жоғары нәтижелер көрсетті. Шаңғымен үлкен тұғырдан секіруден Илья Мизерных сегізінші орынға тұрақтады. Конькимен жүгіруде Надежда Морозова алтыншы, Елизавета Голубева жетінші, ал Евгений Кошкин тоғызыншы нәтиже көрсетті.
Шорт-тректен Денис Никиша жетінші орын иеленсе, фристайл-могулдан Анастасия Городко сегізінші, Павел Колмаков тоғызыншы сатыға жайғасты. Ал мәнерлеп сырғанаудан Софья Самоделкина үздік ондықты түйіндеді.
Осылайша, XXV қысқы Олимпиада ойындары Қазақстан спорты үшін тарихи жеңіс пен жарқын нәтижелер кезеңі ретінде есте қалды.
