|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Украинадағы соғысқа байланысты Жапония Ресейге қосымша санкциялар енгізуді мақұлдады. Бұл шектеулер қазақстандық бір ұйымға да әсер етті, - деп хабарлайды Dauletten.kz.
Бұл шешім Жапония министрлер кабинеті отырысында қабылданғаны белгілі болды. Экспортқа тыйым салынған тауарлар тізіміне кран қозғалтқыштарына арналған бөлшектер, арнайы жабдық бөлшектері және шағын мотоциклдер сияқты 335 позиция қосылды. Мұндай тауарлар Ресейдің өнеркәсіптік әлеуетін арттыруы мүмкін деп бағалануда.
Сонымен қатар, химиялық қару жасауға пайдаланылуы мүмкін капсаицин сияқты химиялық заттарды экспорттауға тыйым салынды. Экспорттық шектеулер 23 қаңтардан бастап күшіне енеді.
Үкімет шешімінде Ресейге санкцияларды айналып өтуге көмектесуі мүмкін деп күдіктелген алты елдің 31 ұйымына экспортқа тыйым салу қарастырылған. Бұл ұйымдар Қазақстан, Біріккен Араб Әмірліктері (БАӘ), Қытай, Қырғызстан, Таиланд және Түркия аумағында орналасқан.
Санкцияға іліккен ұйымдардың нақты атауы көрсетілмеген. Осыған байланысты Қазақстанның Индустрия және құрылыс министрлігінен қосымша ақпарат сұратылды.
Сондай-ақ, Ресейден 11 жеке тұлға, 29 ұйым және 3 банк, сондай-ақ Ресеймен байланысы жоқ бір жеке тұлға мен бір банк активтерді бұғаттау тізіміне енгізілгені хабарланды.
Жапония министрлер кабинетінің бас хатшысы Есимаса Хаяши баспасөз мәслихатында Жапония G7 елдері және халықаралық қауымдастықпен бірлесе отырып, Украинадағы жағдайды шешуге бағытталған күш-жігерге үлес қосатынын мәлімдеді.
