|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
«Ұлттық қор - балаларға» жобасы бойынша биыл 18 жасқа толған қазақстандықтарға 100 доллар түседі. Бағдарламаға қатысушылардың жалпы саны – 6 919 131 бала. Аталған жобаға қатысты көптің көкейіндегі сұрақтарға Мәжіліс депутаты Дәулет Мұқаев пікір білдіріп, жауап берді.
– Ұлттық қордан бөлінетін қаржы үшін балаларды тіркеу қажет пе?
– Балаларды ешқайда тіркеудің қажеті жоқ. Тек балаңыздың ЖСН (жеке сәйкестендіру нөмірі) болса жеткілікті. Барлығы автоматты түрде жүзеге асады.
– Ол қаражатты қандай жағдайда, қашан пайдалануға болады?
– Бұл қаражат екі мақсатта ғана пайдаланылады. Біріншісі - білім бағытында, екіншісі - баспана бағытында. Егер бала оқуға грантқа түсе алмай қалған жағдайда, осы қаржысымен оқуын төлей алады. Ал грант ұтып, оқу үлгерімі жақсы болған жағдайда ол екінші мақсатқа, яғни үй алу үшін пайдалана алады. Әрине, үй сатып алуға жеткілікті қаражат жиналмайды. Дегенмен алғашқы жарна ретінде жақсы қаражат жиналатыны анық.
– Жинақталған соманың мөлшерін қай жерден біліп отыруға болады?
– Аталған бағдарламаға арнайы сайт ашылған. Сайтқа кіріп, балаңыздың ЖСН-ын жазып, жиналған қаражатты тексеріп отыра аласыз.
– Азаматтық алып үлгермеген қандастардың балалары жобаға қатыса ала ма?
– Бала Қазақстан азаматтығын алған уақыттан бастап 18 жасына дейін ақша аударылады. Ал басқа ел азаматтығын алған балаларға қордан қаражат бөлінбейді.
– Кәмелеттік жастан асқан баласы бар, не мүлде баласы жоқ азаматтар бағдарламаға қатыса ала ма?
– 18 жастан асып кеткендер бұл жобаға қатыса алмайды. Сәйкесінше, баласы жоқ азаматтар да бағдарламаға қатыспайды. «Ұлттық қор - балаларға» деген атауы айтып тұрғандай, бұл тек балаларға арналған жоба.
– Жинақталған қаражатты бірден шешіп алуға бола ма?
– Жинақталған қаражатты бала 18-ге толған соң ғана пайдалана алады. Ол қаражатты қолма-қол алу мүмкін емес, тек оқуға немесе баспанаға арнайы банк арқылы төлем жасай аласыз. Қолма-қол берілетін болса, ол ақша басқа бағытта жұмсалып кетуі әбден мүмкін.
– Бала кәмелет жасына толған соң, жиналған ақшаны неше жылда пайдалана алады?
– 18 жасқа толған қазақстандық шоттағы ақшаны 10 жыл ішінде пайдалана алады. Ал 10 жыл ішінде пайдаланбаса, жинақталған қаражат азаматтың зейнетақы шотына аударылады. Яғни, зейнетақы есебіне есептеледі.
– Кәмелет жасына толған соң бала шетелде білім аламын десе, қаражатты пайдалануға шектеу болмай ма?
– Білім алу мақсатында пайдаланар болса ешқандай шектеу жоқ. Білімге арналған ақша Қазақстанда жұмсалса да, шетелде жұмсалса да шектеу болмайды. Ал баспанаға шектеу қойылған. Мысалы, баспанаға жиналған қаражат тек Қазақстан аумағындағы үйлерге ғана жұмсалады. Ал шетелден үй алам деп жарна ретінде пайдалану мүмкін емес.
– 100 доллар аз ғой деген пікірлер бар. Оған қатысты не айтасыз?
– Енді әрине, барлық адамның көңілінен шығу мүмкін емес. Бірақ менің ойымша, бұл жоқтан жақсы. Өзім тәуелсіздіктің құрдасы болсам да, осыған дейін Ұлттық қордың табысынан ештеңе алып көрмеппін. 100 доллар түгілі 100 теңге берілмеді. Сондай-ақ келесі жылдары берілетін сома 100 доллардан көп, не аз болуы мүмкін. Барлығы Ұлттық қорға бөлінетін инвестицияға байланысты болады. Мұның барлығы менің ойымша, біздің ұрпаққа жасалған мүмкіндік, аз да болса инвестиция. Баласының болашағына деп нәресте өмір есігін аша сала ақша салып жатқан ата-аналар да көп емес. Сондықтан мұны жақсы жоба деп айтуға болады. Себебі Парламент қабырғасында осы Заңды қабылдадық, түрлі жұмыс топтары өтті. Бұл да бір есте қаларлық тарихи сәттердің бірі.
Тағы көру
