Жаңалықтар

Дәулет және оның оқырмандары алты отбасыға баспана сыйлады

22.05.2020

2 мин

8

4088

Дәулет Төлеутайұлы оқырмандарымен кезекті қайырымдылық акциясын ұйымдастырып, алты күнде алты отбасы үйлі болды. Жиналған қаржы сомасы - 100 миллион теңге. 

Баспананы алғашқылардың бірі болып, Шымкенттегі 8 баласы бар жалғызбасты әке Әдихан аға алды. Дәулеттің оқырмандары баспанаға қажетті соманы небәрі 8 сағаттың ішінде жинаған. 21 мамыр күні көпбалалы әкеге баспананың кілті табысталды.

"Әдихан ағаның оқиғасын оқып, баспана сыйлайық деп, бірден ақша жинауды бастадық. Сөйтіп, бір күнде оған Шымкенттен баспана алып бердік. Үйді түсіріп берген бағасы - 6,5 миллион теңге. Үйге қажетті жиһаз бен керек-жарағын алу үшін тағы 1 миллион теңге бердік", - дейді ол.

Кезекті баспана Семей қаласының тұрғыны – Шалқар Сухатұлына берілді. Ол 6 баланы асырап отырған жалғызбасты әке. Үйге жиналған қаржы 7,5 миллион теңге. Бұл қаражат та оқырмандар арқасында бір күнде жиналған.

Сондай-ақ, Дәулет Төлеутайұлының «Бизнеске бағыт» кітабын алушылар арасында қайырымдылық жасалып, Нұр-Сұлтан қаласының сол жағалауынан бір бөлмелі пәтер 9 баласы бар анаға табысталды.

«Пәтерді Гүлжамила есімді қала тұрғынына сыйладық. Гүлжамиланың 7 баласы бар және бауырының тағдыр тәлкегіне түскен 2 баласын өз қамқорлығына алған. Алайда оның 9 баласымен тұрып жатқан жалдамалы пәтері өртке оранады. Абырой болғанда балалары аман. Осы отбасыға құны 13 миллион тұратын пәтерді алдық. Жаңадан салынып жатқан үй болғандықтан, кілт шілде-тамыз айында табысталады. Бұйырса, алда тағы қоныс той», - дейді Дәулет.

«Жетім көрсең жебей жүр». Дәл осы ұранмен оқырмандар бірлесе отыра екі отбасына көмек қолын созған. Біріншісі, үш баланың анасы Әйгерім ауырып көз жұмса, әкесі Болат суға кеткен. Ал екінші отбасы – үш баланың ата-анасы жол апатынан қайтыс болған екен.

Instagram әлеуметтік желісінде оқырмандарға көпбалалы отбасына көмек беруге ұсыныс жасағанда, хаттар арасында Құралбай мен Пернегүлдің оқиғасы көпшілікті таңқалдырғаны рас. Бұл отбасы бас қаладағы жатақханалардың бірінде бөлме жалдап тұрған. Пернегүл ханым 11-ші балаға аяғы ауыр. 20 мамыр күні бұл отбасына Қоянды елді мекенінен үй табысталды.

Ал Мақтаарал ауданына көмек қолын созу үшін жиналған 24,3 миллион теңгеге Ұлттық бірыңғай тестілеуден өтетін түлектерге ноутбук табысталады. Салтанатты табыстау рәсімі 22 мамыр күні Мырзакент кентінде өтеді. 

Назерке БАЙЖАН