Жаңалықтар

Delta Airlines ұшағы Торонто әуежайына қонар кезде аударылып кетті

18.02.2025

1 мин

0

102

Delta Airlines әуе компаниясына тиесілі Bombardier CRJ900LR ұшағы Торонто халықаралық әуежайына қону кезінде аударылып, апатқа ұшырады. Оқиға салдарынан 18 адам зардап шекті, - деп хабарлайды Dauletten.kz.

Ұшақ бортында барлығы 76 жолаушы мен төрт экипаж мүшесі болған. Көпшілігі эвакуацияланып, зардап шеккен жоқ.

N932XJ тіркеу нөмірі бар (Delta Connection брендімен ұшады) лайнер DL4819 рейсін орындаған. Ол АҚШ-тың Миннеаполис қаласынан ұшып шыққан, ал оператор – Delta-ның еншілес компаниясы Endeavor Air.

Оқиға орнынан түсірілген кадрларда ұшақтың қар жамылған жолақта жатқанын, жанында өрт сөндіру машиналары тұрғанын көруге болады. Апаттан кейін ұшақтың артқы бөлігінен, яғни қозғалтқыштары орналасқан тұстан түтін шығып жатқаны байқалған.

Әлеуметтік желілерде жолаушылар түсірген видеолар да тарады. Онда адамдардың ұшақтан қалай шығып жатқаны көрінеді.

Апаттың себебі белгісіз. Канада көлік қауіпсіздігі басқармасы тергеу бастады.

Бұған дейін апат кезінде бір бала мен екі ересек жолаушы ауыр жарақат алғаны хабарланған болатын. Алайда, әуежай басшысы Дебора Флинт баспасөз мәслихатында ауыр жараланғандардың жоқ екенін мәлімдеді.

- Миннеаполистен келген Delta Air Lines ұшағының қонуы кезінде болған оқиғадан хабардармыз. Оқиға орнында төтенше қызметтер жұмыс істеп жатыр. Барлық жолаушылар мен экипаж мүшелері бақылауда, – делінген әуежай хабарламасында.

Оқиғадан кейін Торонто әуежайы уақытша барлық рейстерді тоқтатты. Кейін жұмыс қайта жанданды, бірақ бес ұшу-қону жолағының екеуі әлі жабық.

Өткен демалыс күндері Канаданың шығысын қарлы дауыл басып, көптеген әуе рейстері кейінге шегерілді немесе тоқтатылды.

Апат жергілікті уақыт бойынша 14:15-те орын алған. Сол кезде Торонто әуежайы маңында ауа температурасы шамамен -10 градус болған.