Жаңалықтар

Депозитке 5 пайыз салық салынады деген ақпарат жалған болып шықты

05.11.2026

0 мин

0

123

Сурет: azh.kz

Қазақстанда жеке тұлғалардың банктік депозиттерінен түсетін сыйақыға жеке табыс салығын салу жоспарланып отырған жоқ. Ұлттық экономика министрлігі әлеуметтік желілерде тараған жаңа салық енгізіледі деген ақпаратты жоққа шығарды, — деп хабарлайды Dauletten.kz.

Қазақстандықтардың депозиттерінен түсетін пайыздық табысқа салық салу мәселесі Үкіметтің күн тәртібінде жоқ. Бұл туралы Ұлттық экономика министрлігі мәлімдеді.

JAQ.OrtCom Жалған ақпаратқа қарсы іс-қимыл орталығының хабарлауынша, соңғы уақытта әлеуметтік желілерде жеке тұлғалардың банктік салымдары бойынша алатын сыйақысына салық енгізіледі деген мәліметтер қайта тараған. Алайда бұл ақпарат шындыққа сәйкес келмейді.

Ведомство түсіндірмесіне сәйкес, Қазақстан Республикасының Салық кодексінің 430-бабында жеке тұлғалардың банктік депозиттері бойынша алатын сыйақысын жеке табыс салығынан босату нормасы қарастырылған.

Министрлік бұл норманы өзгерту немесе депозит сыйақысына салық енгізу мәселесі Үкіметте талқыланып жатпағанын нақтылады.

Сонымен қатар Жалған ақпаратқа қарсы іс-қимыл орталығы көрінеу жалған мәліметтерді қасақана таратудың заңда белгіленген жауапкершілікке әкелуі мүмкін екенін ескертті.

Осылайша, қазіргі уақытта жеке тұлғалардың банктік депозиттері бойынша сыйақысына жеке табыс салығы салынбайды.