|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Ұлттық банк теңгені тұрақтандыру шарасын қолға алды. Мемлекеттік компаниялар валюталық кірістің жартысын сатуға міндеттеледі, - деп хабарлайды Dauletten.kz.
Қазақстанда доллар бағамының өсуіне байланысты Ұлттық банк квазимемлекеттік сектор компанияларын валюталық түсімдерінің 50%-ын сатуға қайта міндеттеді. Ұлттық банк төрағасының орынбасары Әлия Молдабекованың айтуынша, теңгенің әлсіреуіне сыртқы және ішкі факторлардың ықпалы тиген.
Сыртқы факторлар
Молдабекова сыртқы нарықтағы жағдайдың күрделі екенін атап өтті. Бұл жаһандық экономикадағы қауіптердің сақталуымен және валюта құбылмалылығымен байланысты.
- АҚШ долларының нығаюы жалғасуда. DXY индексі қыркүйектен бері 5,5%-ға өсіп, 106,2 деңгейіне жетті. Сонымен қатар, дамушы нарықтардың валюталарының индексі қыркүйек айынан бері 4,1%-ға төмендеді, – деді ол.
Мұнай нарығындағы ахуал да теңге бағамына қысым көрсетуде. Әлемдік сұраныстың баяу қалпына келуі мен ОПЕК+ тарапынан ұсыныстың ұлғаюы мұнай бағасының барреліне 71-72 долларға дейін төмендеуіне себеп болды.
Ішкі факторлар
Ішкі валюта нарығында шетел валютасына сұраныс артып отыр. Бұл экономикалық белсенділіктің, әсіресе сыртқы экономикалық белсенділіктің өсуімен байланысты. Сонымен қатар, бюджет шығыстарының ұлғаюы, квазимемлекеттік компаниялардың инфрақұрылымдық және инвестициялық жобаларға жұмсаған шығындарының артуы шетел валютасына деген сұранысты көбейтуде.
- Бұл факторлар импорттың өсуіне әкеліп, валюта нарығындағы сұранысты арттырып отыр, – деді Молдабекова.
Валюталық тепе-теңдікті сақтау шаралары
Ұлттық банк валюта нарығындағы сұраныс пен ұсыныс теңгерімінің бұзылуы экономикалық ахуалға кері әсер ететінін айтты. Бұл инвестициялық жобалардың қымбаттауына және инфляциялық қысымның күшеюіне себеп болуы мүмкін.
- Валюталық тепе-теңдікті сақтау мақсатында квазимемлекеттік сектор субъектілерін валюталық түсімдерінің 50%-ын сатуға міндеттеу талабы қайта енгізіледі. Үкіметтің қаулысы мен Ұлттық банктің бұйрығы жақын арада қабылданады, – деп мәлімдеді Молдабекова.
Бұл талап бұған дейін 2023 жылдың тамызына дейін қолданыста болған, бірақ макроэкономикалық жағдайдың өзгеруіне байланысты уақытша тоқтатылған еді.
