Баспанаға бағыт

«5-10-20» бағдарламасы қашан басталады?

28.06.2020

1 мин

126

16105

Мемлекет тарапынан халықтың баспаналы болуына жаңа бағдарламалар жасалып келеді. Соның бірі – «5-10-20» бағдарламасы. Жоба аясында әкімдікте кезекте тұрған қазақстандықтардың баспаналы болу мүмкіндігі жоғарылайды деп жоспарланған.

Елімізде тұрғын үй алуға кезекте тұрған адам саны 1 қаңтардағы есеп бойынша 540 мыңнан асты. Оның ішінде бағдарламаға мемлекеттік қызметкерлер, бюджеттік ұйым саласы, әскери қызметкерлер, толық емес отбасылар, жетім балалар, І және ІІ топтағы мүгедек жандар, көпбалалы отбасылар, мүгедек балалары бар отбасылар, зейнеткерлер қатыса алады.

Бағдарламаның басты талаптарының бірі – баспана алғысы келетін адамның атында үй болмауы. Сондай-ақ бастапқы жарна Тұрғын үй құрылыс жинақ банкі шотында жиналуы шарт. Бағдарламаның аты айтып тұрғандай, 5 пайыздық мөлшерлемемен, 10 пайыз бастапқы жарна төлеп, несие ұзақтығын 20 жылға дейін алуға мүмкіндік бар.

Жоба аясында өзіңіз қалаған құрылыс компаниясы ұсынған және «Нұрлы жер» бағдарламасы аясында салынған үйлерді таңдауға болады.

Жалақы мөлшері қалай есептеледі?

Бағдарлама барысында азаматтардың әкімдік кезегінде тұруынан бөлек, жалақы мөлшеріне де көңіл бөлінеді. Отбасының әр мүшесіне шаққандағы табысы есепке алынады. Жобаға табыс көрсеткіші екі айлық ең төменгі күнкөріс деңгейінен 3,1 айлық ең төменгі күнкөріс деңгейіне дейінгі азаматтар қатыса алады. Бұл 65 мың 336 теңгеден 101 мың 270 теңгеге дейінгі табыс мөлшерін құрайды.

Мысалы, Мырқымбайдың отбасында 4 адам деп алатын болсақ, яғни Мырқымбай, оның әйелі және екі баласы. Ал табыс мөлшері 300 мың теңге делік. Осы орайда, ортақ табысты әр отбасы мүшесіне бөлеміз.

300 мың: 4 = 75 мың теңге

Демек, бұл жанұя «5-10-20» бағдарламасы арқылы баспаналы бола алады. Себебі айлық табыс көрсеткіші – 101 мың 270 теңгеден аспайды.

Ал басқа отбасында күйеуінің табысы 220 мың теңге, ал әйелінікі 130 мың деп алайық. Яғни, ортақ жалақы – 350 мың теңге. Сондай-ақ отбасында бала жоқ делік. Бұл жағдайда 101 мың 270 теңгені 2 адам санына көбейтеміз, нәтижесінде 202 мың 540 теңге шығады. Алайда отбасының табыс мөлшері одан жоғары. Сол себепті бұл отбасы «5-10-20» бағдарламасы арқылы баспана ала алмайды.

Бағдарлама қашан басталады?

«5-10-20» бағдарламасы шілде айында бастау алмақ. Осы орайда, Индустрия және инфрақұрылымдық даму министрі Бейбіт Атамқұлов үкіметке берген есебінде осы жылы 15 миллион шаршы метр тұрғын үйді салу жоспарланып отырғанын айтты. Бұл – 150 мыңдай пәтер. Оның айтуынша, жыл басынан бері 25 мың пәтер пайдалануға берілген.

«Осы жылы Мемлекет басшысының тапсырмасымен кезекте тұрған азаматтардың баспана мәселесін шешу мақсатында «Шаңырақ» пилоттық жобасын бастаймыз. Бұл жобаға 390 миллиард теңге бөлініп отыр. Оның 180 миллиард теңгесі аймақтарға әлеуметтік баспана салу үшін жұмсалады. Ал 210 миллиард теңге Тұрғын үй құрылыс жинақ банкі арқылы «5-10-20» бағдарламасы бойынша беріледі», – деді Бейбіт Атамқұлов.

Әкімдіктер салған ипотекалық тұрғын үйдің 1 шаршы метріне мынадай баға параметрлері белгіленген:

• Нұр-Сұлтанда және осы қала маңындағы аймақта 220 мың теңгеге дейін;
• Алматы қаласында 240 мың теңгеге дейін;
• Шымкент қаласында және Алматы маңындағы аймақта 200 мың теңгеге дейін;
• Ақтөбе, Атырау, Ақтау, Түркістан және Қарағанды облыстарында 180 мың теңгеге дейін;
• өзге өңірлерде 160 мың теңгеге дейін.