|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Алмалы аудандық сотында 2024 жылғы маусым айында болған, адам өліміне әкеп соққан автобус апатына қатысты ашық сот отырысы өтті. Оқиға салдарынан 25 жолаушы зардап шегіп, бір адам қаза тапқан. Бүгін сот отырысында прокурор айыптау актісін жариялады, - деп хабарлайды Dauletten.kz.
Қылмыстық іс материалы
Сотталушы Анель Сартаева Қылмыстық кодекстің 345-бабы 3-бөлігі (абайсызда адам өліміне әкелген әрекет) бойынша айыпталды. Бұл бап бойынша оған бес жылға дейін белгілі бір қызметпен айналысу құқығынан және бас бостандығынан айыру жазасы тағайындалуы мүмкін.
Мемлекеттік айыптау мәліметінше, 26 маусымда “Kia Sportage” көлігінің жүргізушісі Масанчи көшесінде оңтүстік бағытта қозғалып, Мақатаев көшесінің қиылысында жол қозғалысы ережелерін бұзған. Жүргізуші 2.4 “Жол бер” белгісін елемей, басты жолда келе жатқан автобуспен соқтығысқан. Соқтығыс салдарынан автобус бағдаршамға соғылып, тротуарға шығып кеткен және дүкенге соққан. Оқиға орнында автобустағы жолаушылардың бірі қаза тапты, ал жарақат алғандар ауруханаға жеткізілді.
Жүргізушінің сөзі
Сотталушы сол күні төрт айлық қызын тамақтандыру үшін жұмыстан үйіне асығып бара жатқанын айтты.
- Масанчи көшесінде бағдаршам болмағандықтан, қозғала бастадым. Соқтығысқанымды сездім. Қауіпсіздік жастығы іске қосылып, бір сәтке есімнен танып қалдым. Есікті ашып шыққанда, автобустың жағдайын көріп, бірден көмек көрсетуге тырыстым, – деді Сартаева.
Сараптама нәтижесінде көлік сағатына 20 шақырым жылдамдықпен қозғалғаны анықталды. Сартаеваның тоғыз жылдық жүргізушілік тәжірибесі бар және бұрын қылмыстық жауапкершілікке тартылмағаны ескерілді.
Сотталушының өкініші
Сартаева сотта кінәсін толық мойындап, істеген әрекетіне өкініш білдірді. Ол зардап шеккендерден және қаза болған адамның туыстарынан кешірім сұрады.
- Өкінішімді сөзбен жеткізу мүмкін емес. Бұл қайғы мен үшін де ауыр сынақ болды. Марқұм үшін күн сайын дұға етемін, – деп, сотталушы көзіне жас алды.
Қаза болған адамның туыстарының шешімі
Марқұмның ағасының айтуынша, қайтыс болған әйел сол күні жұмысқа автобуспен бара жатқан. Оқиға туралы ол мәйітханаға қоңырау түскенде ғана білген. Сартаеваның әкесі моральдық шығынды өтеуді ұсынғанымен, отбасы қаржылық қиындықтары жоқ екенін айтып, ақшадан бас тартқан.
- Сотқа дейінгі тергеп-тексеру кезінде сотталушының туыстары барлық жәбірленушілерге келтірілген шығынды өтеді. Қаза тапқан жолаушының туыстары кешірім беріп, материалдық өтемақы алудан бас тартты, – деді сотталушының адвокаты.
