Қаржылық сауат

Банк картасы ұрланған немесе жоғалған жағдайда не істеу керек?

07.06.2020

2 мин

12

4397

Бүгінгі таңда кез келген төлемді банк картасы арқылы жасауға мүмкіндік бар. Әрбір төлемге бонустар да беріледі. Сол себепті адамдар төлемді карта арқылы жасауды әдетке айналдырды. Қолма-қол ақшадан гөрі банк картасын құп көреді. Сондықтан картаны ұрлату, ұмыту, жоғалту жағдайлары жиі болады. Ондай жағдайда не істеу керек?

Егер банк картасын ұрлатып алсаңыз, алаяқтықтан қорғану үшін картаны дереу бұғаттау қажет. Ұялы телефоныңызда банктің мобильдік қосымшасы болса, картаңызды интернет-банкинг арқылы жылдам бұғаттай аласыз. Мәселені банктің байланыс орталығына хабарласып, оператордың көмегімен де тез шешуге болады.

Көп жағдайда банк картасы ұрланбау үшін немесе ұрланған жағдайда да қылмыскердің ақшаңызды жымқыра алмауы үшін пин-кодыңызға абай болуыңыз керек. Себебі зардап шеккендердің басым көпшілігі пин-кодты картаның өзіне немесе әмияндағы қағазға жазып қояды екен. Оны ешкімге айтпау, есте сақтау маңызды.

Оған Нұр-Сұлтан қаласының тұрғыны Айдана Әріпбаеваның жағдайы мысал бола алады. Көлікке жанармай құю үшін күйеуіне банк картасын беріп, көлікте отырған көршісінің көзінше пин-кодын айтқан. Жанармай құйған соң жолдасы картаны қайтарған. Бірақ келесі күні ұялы телефонына картадан екі мың теңге шешілгені туралы хабарлама келген.  

- Абырой болғанда картам ұрланбай тұрып ақшамның көп бөлігін шешіп алғанмын. Картада екі мың теңге ғана қалған. Ақша алынды деген хабарлама келген соң картамды іздеп, таба алмадым. Содан соң полицияға шағымдандым. Онда банкоматта орнатылған камера жазбалары арқылы картамды көршім ұрлағанына көзім жетті, – дейді Айдана.

Ұқсас оқиға нұрсұлтандық Әбигүл Мұқаділдің басынан да өткен. Бірақ ол картасын ұрлатпаған, банкоматта ұмытып кеткен. Біраздан соң телефонына супермаркеттен төрт жүз теңгеге сауда жасалды деген хабарлама келген. Банк картасының бөгде адамның қолына түскенін түсінген ол дереу банкке хабарласып, картасын бұғаттаған.

Банк картаңызды жоғалтқан жағдайда, бұғаттамас бұрын қайда жоғалтқаныңызды еске түсіріп көріңіз. Себебі кейбір банктерде бұғатталған картаны қайта қалпына келтіру қиынға соғады.

Сақтық үшін банк картасынан ақша алу және ондағы ақшаны пайдалануға, интернет төлемдерге лимит қойған жөн. Сонда картаңыз ұрланса да, қылмыскердің барлық ақшаңызды жымқыруына жол бермейсіз. Интернет-дүкендерден сауда жасағанда қауіпсіздік үшін интернет-банкингке 3D-Secure орнату керек. Бұл қызмет сіздің төлемдеріңіздің қауіпсіздігін қамтамасыз етеді. Кейде интернетте сауда жасау үшін виртуалды карта ашқан да дұрыс.