Жаңалықтар

Қазан айында кімдерге ең жоғары жалақы ұсынылды

12.11.2025

мин

0

994

Сурет: Zakon.kz

Қазан айында Электронды еңбек биржасында жұмыс берушілер 132 мың бос жұмыс орнын және 114,1 мың түйіндеме орналастырды. Қыркүйекпен салыстырғанда белсенділік сәл төмендегенімен, еңбек нарығы тұрақты күйінде қалып отыр, ал сұраныс пен ұсыныс арасындағы теңгерім сақталған, - деп хабарлайды Dauletten.kz.

Бос жұмыс орындары

Дәстүрлі түрде бос орындардың ең үлкен үлесі білім беру саласында тіркелді — 41,1 мың немесе 31%. Одан кейін өзге қызмет түрлері – 17,5 мың (13%), сондай-ақ денсаулық сақтау және әлеуметтік қызмет көрсету саласы – 11,7 мың (9%) көрсеткішімен келеді. Осы үш бағыт барлық ұсыныстардың шамамен жартысын құрай отырып, әлеуметтік сектордың еңбек нарығындағы маңызын айқындайды.

Өңірлік көрсеткіштер

Қазан айында жұмыс берушілер мен жұмыс іздеушілер белсенділігі өңірлер арасында шамалас болды. Бұл жағдай еңбек нарығының аймақтық құрылымының тұрақтанғанын көрсетеді.

Бос орындар саны бойынша алдыңғы қатардағы өңірлер:

• Түркістан облысы – 12 мың,

• Астана қаласы – 11,4 мың,

• Жамбыл облысы – 8,8 мың.

Түйіндемелер саны жағынан да Түркістан облысы көш бастап тұр – 13,4 мың. Одан кейін Астана қаласы – 9,1 мың және Қызылорда облысы – 8,3 мың.

Жас ерекшелігі

Түйіндемелердің шамамен жартысы (45% немесе 51,4 мың) — 34 жасқа дейінгі азаматтарға тиесілі.
35–44 жас аралығындағы топ – 26% (29,2 мың),
45–54 жас аралығындағылар – 19% (21,8 мың),
ал 55 жастан асқандар – 10% (11,7 мың).

Әйелдердің белсенділігі жоғары: барлық түйіндемелердің 52%-ын әйелдер жолдаған.

Сұранысқа ие мамандықтар

Жоғары біліктілікті талап ететін мамандықтар арасында қазан айында ең көп сұранысқа ие болғандар:

• тәрбиешілер – 1,8 мың,

• бухгалтерлер – 1,1 мың,

• математика пәні мұғалімдері – 1 мың.

Орта буын мамандықтары бойынша сұраныс келесідей:

• қазандық операторлары – 6,9 мың,

• егіншілер – 2,2 мың,

• медбикелер – 1,9 мың.

Жұмыс іздеушілердің түйіндемелері де осы бағыттарға сай келеді. Ең көп түйіндеме бухгалтер (2,2 мың), заңгер (1,6 мың), тәрбиеші (1,6 мың), сондай-ақ қазандық операторы (3,7 мың), медбике (1,9 мың) және автокөлік жүргізушісі (1,6 мың) мамандықтары бойынша берілген.

Жалақы деңгейі

Жұмыс берушілер ұсынған ең жоғары жалақылар мына лауазымдарда байқалды:

• өндіріс басшысының орынбасары — шамамен 1 млн теңге,

• компьютерлік ойындар дизайнері — 990 мың теңге,

• омбудсмен — 990 мың теңге.

Ал жұмыс іздеушілердің күтілетін жалақысы бұдан да жоғары болды.

Ең жоғары жалақы сұралған мамандықтар қатарына мыналар кіреді:

• коммерциялық әуе рейстерінің ұшқышы — шамамен 2,8 млн теңге,

• тау-кен жұмыстары мен өрт сөндіру бойынша маман — 2 млн теңге,

• басқарма төрағасының орынбасары — 1,8 млн теңге.