Жаңалықтар

Базалық мөлшерлеменің төмендеуі депозиттерге қалай әсер етеді?

05.06.2026

мин

0

77

Сірет: orda.kz

Ұлттық банктің базалық мөлшерлемені 17 пайызға дейін төмендету туралы шешімі депозит ұстаушылар арасында түрлі сауал туғызды. Реттеуші бұл өзгеріс салымдардың тартымдылығына айтарлықтай әсер етпейтінін айтып отыр, — деп хабарлайды Dauletten.kz.

Қазақстан Ұлттық банкі базалық мөлшерлемені 18 пайыздан 17 пайызға дейін төмендетті. Бұл шешім елдегі инфляция деңгейінің бірнеше ай қатарынан баяулауына байланысты қабылданған.

Ұлттық банк төрағасы Тимур Сүлейменовтің айтуынша, мөлшерлемені төмендету мәселесі бірнеше нұсқа бойынша қарастырылған. Нәтижесінде экономикалық көрсеткіштер мен инфляциялық үрдістер ескеріліп, бір пайыздық тармаққа қысқарту туралы шешім қабылданды.

Сарапшылардың пікірінше, базалық мөлшерлеменің өзгеруі депозиттік өнімдер бойынша сыйақы көлеміне әсер етуі мүмкін. Дегенмен қазіргі жағдайда салымдар инфляция деңгейінен едәуір жоғары кіріс әкеліп отыр.

Ресми мәліметке сәйкес, елдегі жылдық инфляция 10,4 пайыз деңгейінде қалыптасқан. Ал банктердегі депозиттердің орташа табыстылығы шамамен 19–20 пайызды құрайды. Сондықтан мөлшерлемелер аздап төмендеген жағдайда да салымшылар нақты табыс алу мүмкіндігін сақтап қалады.

- Тіпті депозиттік мөлшерлемелер 1 пайызға төмендеген күннің өзінде олардың кірістілігі инфляциядан айтарлықтай жоғары болады. Сондықтан салымшылар үшін депозиттер әлі де тиімді құрал болып қала береді, – деді Ұлттық банк төрағасы.

Ұлттық банк халықтың депозиттерден жаппай бас тартуын күтпейді. Қаржы реттеушісі банк салымдары азаматтар үшін қаражатты сақтаудың және көбейтудің ең сенімді құралдарының бірі болып қала береді деп есептейді.

Сонымен қатар реттеуші елдің банк жүйесі тұрақты жұмыс істеп тұрғанын атап өтті. Депозиттерге кепілдік беру тетіктері де салымшылардың қаражатын қорғауды жалғастырады.

Осылайша, базалық мөлшерлеменің төмендеуі депозиттердің кірістілігіне белгілі бір деңгейде әсер етуі мүмкін болғанымен, олардың халық үшін тартымды қаржы құралы ретіндегі маңызы сақталады.