Баспанаға бағыт

Ипотекадағы баспананы қалай сатуға болады?

10.08.2021

1 мин

16

14194

Қарыз алушының түрлі жағдайға байланысты ипотекаға алынған баспананы қалай сатуға болатыны жайлы Dauletten.kz сайты толығырақ тоқталады.

Біріншіден, ипотекадағы баспананы сату бойынша банктен кеңес алған дұрыс. Себебі сіз қарыз алған қаржы ұйымының келісімінсіз кепілге салынған мүлік мәртебесінің өзгеруіне байланысты, яғни оны сату, сыйға беру бойынша істі жүргізе алмайсыз.

Банк қызметкерлері сіздің шешіміңізді мақұлдаған жағдайда төмендегі шарттарды анықтау керек:

• баспананы сату жолдары;
• қалған қарыз мөлшерін білу;
• ипотекадағы баспананың нарықтағы құнын анықтау және міндетті түрде белгіленген сома банк алдындағы қарызды жабуға жететінін ескеру;
• сату бағасын келісу.

Екіншіден, баспананы сату әдісін таңдау керек. Ипотекадағы баспананы сатудың бірнеше жолы бар. Олар – қарызды мерзімінен бұрын жабу, үш жақты келісімге келу және құқық тағайындау. Баспананы жылдам сату үшін қаражат болған жағдайда қалған қарызды мерзімінен бұрын жабуға болады. Бұл ипотекадағы баспананы сатудың оңай жолы. Қарыз алушы банкке жазбаша өтініш жасағаннан кейін ақшаны қаржы ұйымының кассасына төлейді. Нәтижесінде, тұрғын үйге құқық белгілейтін құжаттардың түпнұсқаларын алып, ХҚКО-нан кепілдіктен алып тасталынады. Одан кейін баспананы сатып алушымен келісім жасауға болады.

Ал үш жақты келісімге келу жағдайында ипотекаға баспана алған азамат, сатып алушы және банктің қатысуымен келісім өтеді. Банк тараптарына сәйкес, үшжақты құжаттар дайындалады. Құжаттар расталған жағдайда, сатып алушы баспана қаражатын банкке өткізеді және бірнеше күннен кейін баспана иесі ретінде құжаттардың түпнұсқасын қолына алады.

Ипотекадағы баспананы құқық тағайындау тәсілі бойынша сатқан жағдайда сатып алушы қарызды төлеуді жалғастырады. Яғни, бұл тәсіл баспананы ипотекалық қарызбен сату. Сатып алушы несие бойынша міндеттемелерді қабылдауға дайын болған кезде қолданылады. Ол үшін банкке барып өтініш жазу және төлем қабілеттілігін растау керек.
Кепілге алынған мүлікті сатудың артықшылықтары мен кемшіліктері

Кемшіліктердің бірі құжаттарды жинау ұзаққа созылуы мүмкін. Заңға сәйкес, өтініш шамамен 15-30 күн ішінде қаралады. Осы уақыт аралығында баспананы сатып алушы шешімінен бас тартуы мүмкін.

Артықшылықтардың бірі – барлық процесс заңды түрде жүреді. Жылжымайтын мүлікті кепілге қабылдау кезінде банк құқық белгілейтін құжаттарға заңдық талдау жүргізеді, олардың түпнұсқалығын тексереді. Алшақтықтар анықталған кезде (кадастрлық нөмірі, ауданы және т.б. бойынша) жылжымайтын мүлік бойынша ескертулер толық жойылғанға дейін кепілге қабылданбайды.

Кепілдікте тұрған баспананы сату несие уақытылы төленген жағдайда ыңғайлы. Егер сізде несие төлеу барысында ешқандай қиындықтар болмаса, онда ипотекадағы баспананы сату кезінде мәселелер болмайды.

Ескере кететін жайт, ипотекалық шартты өзгерту немесе тоқтату екі тараптың, яғни банк пен қарыз алушының келісімі арқылы өтеді.

Еліміздегі екінші деңгейлі банктерде ипотекалық шарттарында кепілге қойылған мүлікті сатудың арнайы талаптары жоқ. Ипотекалық қарыз уақытылы төленген жағдайда баспананы сату бойынша қиындықтар туындамайды.

Несие бойынша мәселелер шығып,банкте қандайда бір қиындықтар болған жағдайда банк омбудсменіне көмекке жүгінуге болады.

Назерке БАЙЖАН