|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Елімізде Денсаулық сақтау министрлігі коронавирустың кезекті толқынына арнайы жоба әзірлеп жатқанын айтқан еді. Мамандардың айтуынша, әлемде пандемияның екінші толқынына дайындық жүріп жатыр. Вице-министр Людмила Бюрабекова да кезекті толқын күз мезгілінде қайталанып, сол уақытта түрлі вирустық инфекциялар, тұмау, маусымдық аурулар да асқынатындығы жайлы атап өтті. Министрлік жақын арада барлық болжамды ескеріп, құжаттарды жариялайтынын айтты.
Күзгі толқынға дайындық қалай жүріп жатыр?
Мәліметке сүйенсек, елімізде алғаш коронавирус анықталғалы 12,8 млрд теңгеге дәрі-дәрімек сатып алынған. Ал алдағы уақытқа Денсаулық сақтау саласының мамандары күз мезгілінде тұмаудың асқынатындығын ескеріп, дәрі-дәрімектердің 2 айлық қорын жасақтаған. Науқастарды емдеуге 50 түрлі дәрілерді сатып алу үшін 24 миллиард теңге жұмсамақ. Бұл дегеніміз айына 100 мың науқастан, 200 мың адамды қамтиды.
"Шілде айында емханаларда дәрі тапшылығын шешу үшін жоспардан тыс 2,6 млрд теңгеге айлық резерв жөнелтілді. 8,7 млрд теңгеге 40 мың науқасты емдеуге қосымша дәрі сатып алынды. 24 миллиард теңге сомасына 100 мың пациентті емдеуге арналған дәрілік заттар бойынша 2 айлық резерв қалыптастырылды", – деді "СК-Фармация" ЖШС басқарма төрағасы Ерхат Есқалиев.
Екі айлық қорға дәрі-дәрімекпен қатар бетперденің 5,8 млн данасын сатып алу көзделіп отыр. Ал маска бағасы 60 теңгеден сатылуы жайлы келіссөз жүргізіліп жатыр. Бұл туралы Денсаулық сақтау вице-министрі Людмила Бюрабекова онлайн брифинг барысында айтты.
"Ақпан айында бір масканың бағасы 15 теңге болды. Пандемия басталысымен баға қымбаттап кетті. Жеке қорғаныс құралдарын жасайтын тауар өндірушілер бізде бар. Бірақ біз импортқа тәуелді мемлекетпіз. Шикізат Қытайдан келеді. Дәл сол уақытта шикізат қолжетімсіз болғандықтан, елімізде маска тапшылығы болды. Ал қазір біз отандық өндірушілермен келісім жүргізіп, маска бағасын 60 теңгеге түсіруді жоспарлап отырмыз", – деді ол.
Вакцинаға қанша қаражат бөлінеді?
COVID-19-ға қарсы вакцина әлі табылмаса да Денсаулық сақтау министрлігі оған жұмсалатын қаржыны алдын ала есептеді. Екпені алу үшін транспорт жүйесін санамағанда 18 млрд теңге кетеді. Ведомство өкілдерінің айтуынша, бір вакцина бағасы 4 142 теңгеден 8 284 теңгеге дейін болады. Тегін екпені созылмалы аурулары бар, соның ішінде 65 жастан асқан адамдар, жүрек-тамыр жүйесі аурулары, қант диабеті, созылмалы обструктивті өкпе ауруына шалдыққандар ала алады.
Тағы да дәрі тапшылығы қайталана ма?
Дәрі тапшылығына қатысты Ерхат Есқалиев еліміздегі медициналық орталықтардың өз қажеттіліктерін ескеріп, тапсырыс беріп жатқандығын айтты. Мекемелерден тапсырыстар толық қабылданып, алда сатып алу жұмыстары басталады. Ал 2021 жылға арналған жоспар бойынша шілде айында пандемиямен күреске қарсы қолданатын дәрілік заттардың тізімі шықты. Тізімде жалпы 1421 атау көрсетілген. Кестеге 1 015 дәрі-дәрімек және 406 медициналық заттар кірген. Ағымдағы жылдың желтоқсан айында барлық қажетті дәрі-дәрмектер қоймаларда болады деп отыр "СК-Фармация" ЖШС басқарма төрағасы.
Тағы көру
