Қаржылық сауат

Қай елде зейнеткерлер Қазақстанға қарағанда жақсы өмір сүреді?

01.05.2021

1 мин

43

10815

Freedom Finance Life сарапшылары зейнеткерлер қай елде жақсы өмір сүретінін зерттеді.

Компания Еңбек министрлігінің дерегіне сүйене отыра, Қазақстанда 2,2 миллион зейнеткер тіркелгенін атап өтті. Орташа зейнетақы мөлшері 94,9 мың теңгеден ($220) асады. Ерлердің зейнетке шығу жасы 63 жастан, әйелдер үшін 59,5 жастан басталады. Сонымен қатар, әйелдердің зейнетке шығу жасын жыл сайын кезең-кезеңімен арттыру қарастырылған.

«Қазақстанда орташа айлық жалақыны ескергенде, азаматтар зейнетке шыққаннан кейін 2,15 есе аз алады. Салыстырмалы түрде Ресей, Италия, Финляндия және Канадада жалақы мен зейнетақы төлемдерінің арақатынасы да осындай. Десе де Данияда зейнетақы мөлшері ай сайынғы табыстан 1,27 есе төмен», - деп хабарлады Freedom Finance Life.

Зейнеткерлер басқа елдерде қалай өмір сүреді

Лихтенштейн. Бұл елде әлем бойынша ең жоғары жалақы анықталды. Жалақы мөлшері айына орта есеппен 5 мың еуродан астам ($5850). 64 жаста зейнетке шыққан тұрғын орташа есеппен 3 мың еуро ($3510) мөлшерінде төлем алады. Бұл ай сайынғы жалақымен салыстырғанда небәрі 1,66 есе аз.

Дания. Еңбекке қабілетті халық орта есеппен 24 315 крон ($3835) алады. Ал 65 жастан асқан зейнеткерлер 9 мың крон (шамамен $3 мың), яғни бұл дегеніміз жалақыдан 1,27 есе аз.

Финляндия. Мұндағы орташа айлық табыс 3548 еуроны құрайды ($4151). Сіз Финляндияда 63 жастан бастап орта есеппен 1522 еуро ($1781) мөлшерінде зейнетақы төлемдерін ала аласыз, бұл жалақының жартысынан астамына тең.

Жапония. Орташа жалақы мөлшері – 310 мың иен ($2971). 65 жасында зейнетке шыққан адамдар 177 378 иен ($1,7 мың) алады. Бұл сома жалақыдан шамамен бір жарым есе аз.

АҚШ. Америкалықтардың орташа айлық жалақысы 4150 долларды құрайды, бұл зейнетақы төлемдерінен 2,76 (1503 доллар) есе көп. Зейнеткерлік жас ерлер үшін 67, әйелдер үшін 65 жас. Бірақ мерзімінен бұрын зейнетке шығуға мүмкіндік бар. Бұл жағдайда тұрғындар зейнетақы жинағындағы қаражатқа сәйкес 20% айыппұл төлеп, 62 жасында мерзімінен бұрын зейнетке шыға алады.

Италия. Орташа жалақы 2415 еуроны ($2826) құрайды. 67 жасында олар зейнетке шығып, әдеттегі жалақысынан екі есе аз төлем алады. Бұл орта есеппен 1,2 мың еуро ($1404).

Германия. Германиядағы орташа жалақы - 3771 еуро ($4412). Осындай жоғары мөлшердегі жалақы алған 65 жастағы зейнеткерлер ай сайын бұл сомадан бес есе аз төлем алады. Десе де мемлекет тарапынан ай сайын зейнеткерлердің коммуналдық қызметі толық өтеледі.

Ресей. Жалақы орта есеппен 36 мың рубль ($463). Ал зейнетақы жалақының жартысынан астамын, яғни 16,5 мың рубльді құрайды. Ресейде зейнетақы төлемдері әйелдер үшін 56,5 жастан, ерлер үшін 61,5 жастан басталады.

Қырғызстан. Орташа жалақы - 18 мың сом ($215). Бұл елде зейнетке шығу жасы - әйелдер үшін 55 жас, ерлер үшін 60 жас бекітілген. Олар зейнетке шыққанда орта есеппен 6061 сом ($72) ала алады. Бұл төлем мөлшері жалақыдан 3 есе аз.

Freedom Finance Life сарапшыларының айтуынша, барлық елде, оның ішінде Қазақстанда зейнетақы жүйесі жұмыс беруші мен қызметкер арасында зейнетақыны қалыптастыратын жарналарды толықтыру және сақтандыру компанияларымен келісімшарт жасау арқылы жүзеге асады.

Ұлттық Банктің мәліметіне сүйенсек, Қазақстанда ағымдағы жылдың 10 айында зейнетақы аннуитеті бойынша жасалған барлық шарттардың жалпы сомасы 51 млрд теңгеден астам соманы құрады. Бұл өткен жылмен салыстырғанда 10%-ке артық.