ҚҚС – 16 пайыз: Президент жаңа Салық кодексіне қол қойды
18.07.2025
1 мин
0
145
Мемлекет басшысы Қасым-Жомарт Тоқаев жаңа Салық кодексіне және “Қазақстан Республикасының кейбір заңнамалық актілеріне салық салу мәселелері бойынша өзгерістер мен толықтырулар енгізу туралы” Заңға қол қойды, - деп хабарлайды Dauletten.kz.
Ақпаратқа сәйкес, жаңа Салық кодексі салықтық әкімшілендіруді жеңілдетіп, кәсіпкерлерге түсетін жүктемені азайтуға бағытталған. Атап айтқанда:
Салық есептілігі 30%-ға қысқарады;
Салықтардың жалпы саны 20%-ға азаяды;
Жеңілдіктер мен алымдар оңтайландырылады.
ҚҚС-тың жаңа мөлшерлемесі
Қосылған құн салығының (ҚҚС) базалық мөлшерлемесі 16 пайыз болып белгіленді.
Дәрі-дәрмек пен медициналық қызметтерге төмендетілген мөлшерлеме енгізіледі:
2026 жылдан – 5%,
2027 жылдан – 10%.
Ал кейбір қызмет түрлері ҚҚС-тан толық босатылады:
ТМККК және МӘМС аясындағы медициналық қызметтер,
Орфандық және әлеуметтік маңызы бар ауруларды емдеу,
Кітап шығару, археологиялық жұмыстар,
Мерзімді басылымдарды сату кезінде 10%-дық жеңілдетілген ҚҚС қолданылады. ҚҚС бойынша тіркеудің төменгі шегі 10 000 АЕК (40 млн теңге) болып бекітілді.
Жеке табыс пен көлік салығындағы өзгерістер:
Бірыңғай зейнетақы қорынан төленетін төлемдер жеке табыс салығынан (ЖТС) босатылады.
Қолдану мерзімі 10 жылдан асатын көліктерге салынатын салық төмендейді.
Мүгедектігі бар адамдарға әлеуметтік шегерім 882 АЕК-тен 5000 АЕК-ке дейін өседі.
Салықтар мен төлемдер саны қысқарды:
Бірыңғай жер салығы қысқартылды;
Кейбір төлемақылар мен алымдар жойылды.
Арнаулы салық режимдері үш бағыт бойынша сақталады:
Өзін-өзі жұмыспен қамтығандар,
Оңайлатылған декларация,
Шаруа қожалықтары.
Өзін-өзі жұмыспен қамтыған азаматтар салықты мобильді қосымша арқылы төлей алады.
КТС және инвестицияларды ынталандыру:
Корпоративтік табыс салығы (КТС) – 20% деңгейінде қалды.
Бірақ кей салалар үшін сараланған мөлшерлеме енгізіледі:
Банктер мен ойын бизнесі – 25%,
Әлеуметтік сала – 2026 жылы 5%, 2027 жылы – 10%,
Ауыл шаруашылығы – 3% жеңілдетілген мөлшерлеме.
Биржалық құнды қағаздардан түскен дивиденттер салық жеңілдіктерімен сақталады.
“Бәйтерек” холдингі шығарған құнды қағаздар бойынша кіріс 2031 жылға дейін КТС-тен босатылады.
Жаңа пайдалы қазба учаскелері 5 жыл бойы салықтан босатылады.
Прогрессивті табыс салығы
Жылдық табысы 8500 АЕК-тен асатын азаматтарға – 15% ЖТС.
Дивиденттері мен кірісі 230 мың АЕК-тен асатын кәсіпкерлер де осы мөлшерлеме бойынша салық төлейді.
Фермерлерге – 4,5% салық (70% жеңілдік ескеріледі).
Қымбат тауарлар мен мүлікке салынатын салықтар:
75 млн теңгеден қымбат автокөліктер,
100 млн теңгеден жоғары бағаланатын кемелер,
Бір литрі 500 мың теңге тұратын алкоголь,
Бір данасы 10 мың теңгеден асатын темекі – 10% акциз салығына ілігеді.
Жалпы құны 450 млн теңгеден жоғары жылжымайтын мүлікке мүлік салығы көтеріледі.
Салықтық әкімшілендіру жеңілдейді:
Камералдық бақылау ескерту сипатында болады.
Қарыз аз болса, шоттар бұғатталмайды.
Берешек бойынша шаралар кезең-кезеңімен қолданылып, төлемдерді бөліп төлеу мүмкіндігі беріледі.
Жаңа Салық кодексі 2026 жылдың 1 қаңтарынан бастап күшіне енеді.
