Жаңалықтар

Атырау: Он мыңнан астам оқушы сабақты қашықтан оқиды

14.11.2022

2 мин

1

1913

Атырау қаласындағы Геолог, Жұлдыз, Жұмыскер шағынаудандарында және шаһардың ескі бөлігінде орналасқан балабақшалар мен мектептерде электр энергиясы өшіп қалды. Осыған байланысты 10307 оқушы сабақты онлайн оқуға көшірілді, деп хабарлады ҚазАқпарат.

Өткен аптада Президент Қасым-Жомарт Тоқаев Атырауда жарық жиі сөніп қалатынын сынға алған еді.

«Атырау облысындағы тағы бір өзекті мәселе – электр желісінің тозуы. Оның 40 пайызға жуығы ескірген. Биыл 15 елді мекеннің электр желісі жөнделіп жатыр. Дегенмен, бұл жеткіліксіз. Соңғы жылдары аймақта электр қуаты жүйесі дұрыс істемейтін болды. Өңірдегі энергия тапшылығы – шамамен 200 мегаватт. «Атырау Жарық» компаниясының жұмысына қатысты сын-ескертулер бар. Егер компания өз міндеттемесін орындамаса, ондай келісімді бұзу қажет», - деді атыраулықтармен кездесуде Президент.

Атырау қаласында электр энергиясының өшуі кеше, 13 қарашада басталған. Ал бүгін, 14 қарашада 5 балабақша мен 6 мектепте жарық әлі жанбаған.

«Осыған байланысты №26 балабақшадан – 294 бала, №33 балабақшадан – 187, №35 балабақшадан – 278, №36 балабақшадан – 164, Шағала балабақшасынан 139 бала үйіне қайтарылды.

Ал жалпы орта білім беретін 6 мектепте электр жарығы жоқ. Сол себептен, Атырау қаласындағы №2 Ж.Нәжімеденов атындағы орта мектептің – 1874 оқушысы, №35 мектеп-гимназияның – 1564, №36 мектеп-гимназияның – 1445, №39 орта мектептің – 2332, Қ.Смағұлов атындағы орта мектептің – 1429, Б.Нысанбаев атындағы орта мектептің 1663 оқушысы онлайн оқуға көшірілді», - деп хабарлады облыстық білім басқармасының баспасөз қызметінен.

Электр жарығы жоқ балабақшалар мен мектептердің қызметкерлері жұмысын жалғастырып жатыр.

Электр жарығының өшуіне байланысты «Атырау-Жарық» АҚ басшылығы түсінік берген жоқ.