Баспанаға бағыт

«Баспана хит» ит қылмай ма?

13.06.2020

2 мин

79

18599

«Баспана хит» бағдарламасы 2018 жылдың соңында іске қосылды. Бағдарлама жаңа салынған үйлерді және қайталама нарықта қолданыста болған үйлерді алуға арналғандықтан сұраныс басым. Сонымен қатар бұл бағдарлама арқылы атында баспанасы бар адамдар да үй алуға мүмкіндігі бар.

Бағдарламаның негізгі шарттары төмендегідей:

• кредит беру объектісі – жаңа салынған және екінші дәрежелі тұрғын үйлер;
• бастапқы жарнасы 20 пайыздан басталады;
• қарыз мерзімі 15 жылға дейін;
• қарыз валютасы – теңге.

Ал қарыз алушыға қойылатын талаптар мынадай:

• Қазақстан Республикасының азаматтығы;
• өтінім бергенде басқа өтелмеген ипотекалық кредиттерінің болмауы;
• ресми түрде расталған тұрақты табысының болуы.

«Баспана хит» бағдарламасы арқылы жаңа және қолданыста болған, екінші дәрежелі тұрғын үйлерге өтінім бере аласыз. Тек тұрғын үйдің салынған уақыты 50 жылдан аспауы керек. Сондай-ақ бағдарлама арқылы сатып алынатын тұрғын үй бағасына да белгілі шектеу бар:

• Нұр-Сұлтан, Алматы, Ақтау, Атырау – 25 млн теңге;
• басқа аймақтарға – 15 млн теңге.

Жылжымайтын мүлікті республика аумағынан тыс жерден алуға жол берілмейді. Дегенмен тұрғын үйді өзің тіркелген жерден басқа елді мекеннен алуға ешқандай шектеу жоқ.

Қарыз алушының кірісі «Баспана хит» бағдарламасы бойынша үй алуға жеткіліксіз болса, ата-анасы, туыстары және басқа да адамдарды қосалқы борышкер ретінде жұмылдыруға болады.

Жоғарыда аталған бағдарлама талаптары бүгінге дейін сақталғанымен, биыл наурыздан бастап «Баспана хитте» ипотека рәсімдеудің пайыздық мөлшерлемесі айтарлықтай артқанын ескеру керек. Жылдық сыйақы мөлшері - 10.75.

Енді біздің порталдағы ипотекалық калькулятор арқылы 10 млн теңгенің үйін «Баспана хиттің» ипотекасымен алғандағы жалпы бағасы қанша болатынын және банкке төленетін артық төлем құнын есептеп көрейік. Ол үшін бос жолдарды төмендегідей толтырып, «Есептеу» батырмасын басасыз.

Калькулятор есебі бойынша, ипотекаға «Баспана хитпен» алынған пәтердің жалпы құны 16 141 651 теңге болды. Ал банкке төленетін артық төлем құны – 8 141 651 теңге. Ипотека жылын ұзартқан сайын, сіздің артық төлеміңіз де өседі. Сондай-ақ жылдық сыйақы мөлшерлемесі басқа бағдарламалармен салыстырғанда артық екенін ескеріңіз. Бұл бағдарлама бойынша 15 жылға алынған қарыз мөлшері бірге бір үйдің ақшасына жуықтайды. Десе де, бұл жерде ақшаның құнсыздану деңгейін және сіздің жалдамалы пәтерге төлейтін ақшаңызды есепке ала отырып, шешім қабылдау керек. Болашақта баспана аламын деген жоспар болса, пәтердің бағасын біздің сайттағы "Ипотекалық калькулятор" арқылы есептеп, өзіңізге ыңғайлы бағдарламаны таңдауға болады.