|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Елімізде мал ұрлығының алдын алу мақсатында республика бойынша "Мал ұрысы" жедел-профилактикалық іс-шарасы өткізілді, – деп хабарлайды Dauletten.kz.
ІІМ криминалдық полиция департаментінің бастығы Қанат Нұрмағамбетовтің мәліметіне сүйенсек, үш күн ішінде мал мен ет өнімдерін тасымалдаған 12 мың автокөлік, 3,5 мың сату орны, 8,5 мың ферма мен шаруа қожалықтары тексерілді. 121 мал ұрлығы ашылып, 137 күдікті, оның ішінде 19 қылмыстық топ ұсталды. 905 мал басы иелеріне қайтарылды.
Мысалы, Ақмола облысында 46 жылқы ұрлаған екі адамнан тұратын қылмыстық топ ұсталды. Сонымен қатар Павлодар облысында қазан айынан бастап 25 жылқы ұрлаған алты адамнан тұратын қылмыстық топ құрықталды. Қылмыскерлер бірлесіп әрекет етіп, түнде малды 150–ден 300 км жерге дейін айдап әкетіп отырған.
– Қабылданған шаралардың нәтижесінде жыл басынан бері мал ұрлығы 33%-ға төмендеді. Ұрланған малдың жартысынан көбі иелеріне қайтарылды. Мал ұрлығы үшін мүлкі тәркіленіп, 12 жылға дейін бас бостандығынан айыру жазасы қарастырылған, – деп атап өтті Қ.Нұрмағамбетов.
Малыңызды ұры-қарыдан қорғаудың 5 қадамы:
Малға арнайы белгі қою. Барлық малға чип тағу немесе таңба салу қажет;
Қоршауларды нығайту. Қораларға мықты қоршаулар орнатып, жарықтандыруды қамтамасыз етіңіз және бейнебақылау камераларын қойыңыз;
Малды бақылау. Малдың ұзақ уақыт қараусыз қалуына жол бермеңіз;
Ұжымдық жаю. Малды бақташының қадағалауымен жаюды ұйымдастырыңыз;
Малшымен байланыс. Бақташыда телефонның бар екеніне көз жеткізіп, төтенше жағдайда дереу хабарласа алатындай мүмкіндік жасаңыз.
