Қаржылық сауат

IBAN деген не? Оны қалай алуға болады?

04.06.2020

1 мин

14

6441

Жұмысқа орналасқанда, қаржылық төлемдерді жүзеге асыру барысында IBAN қажет болып жатады. Сондықтан IBAN деген не және оны қайдан алуға болатынын білу артық етпейді.

IBAN – Халықаралық стандарттау жөніндегі ұйым және Еуропалық банк стандарттау комитеті әзірлеген банктік шот нөмірінің халықаралық стандарты. Әлемнің 45-тен аса елінде қолданылады. Қысқартылған IBAN сөзі ағылшынша International Bank Account Number яғни, Халықаралық банктік шот нөмірі дегенді білдіреді.

Қазақстанда барлық банк шоттары 2010 жылдың 7 маусымынан бастап IBAN стандартында, яғни  жиырма таңбалы шот нөмірімен ашыла бастады. IBAN Қазақстан ішінде және халықаралық деңгейде төлем жасауға, төлемдердің автоматты түрде өңделуін жақсартуға, сондай-ақ халықаралық төлемдер мен қате төлемдердің өңделуін жылдамдатуға мүмкіндік береді. Дәл осы жиырма таңба арқылы сіздің шотыңызда ақша айналымдары жүреді.

Қазақстандағы IBAN-ның үлгісі: KZ75 125K ZT10 0130 0335

• алғашқы 2 әріптік таңба елдің коды;
• келесі 2 таңба бақылау нөмірі;
• кейінгі 3 цифр банктің коды;
• қалған 13 таңба банк шотының нөмірі.

Жиырма таңбалы шот нөмірін қабылдауға жеңіл болу үшін қағаз нұсқаларда әр төрт таңбадан соң орын қалдырып жазуға рұқсат етілген.

Алайда электронды нұсқада банк шотының нөмірі тұтастай қосылып жазылуы керек.

IBAN-ді банк бөлімшесіне барып немесе банктің мобильді қосымшасы арқылы алуға болады. Ал IBAN-іңізді немесе оны мобильді қосымша арқылы алу жолын өз банкіңіздің байланыс орталығына хабарласып біле аласыз.   

Назерке БАЙЖАН