Жаңалықтар

Нұр-Сұлтан қаласында бизнес-идеяны жүзеге асыруға гранттар беріледі

15.06.2021

1 мин

12

5505

Елордада «Инвестициялар және кәсіпкерлікті дамыту басқармасы» бизнес-идеяларды іске асыру үшін мемлекеттік гранттарға ашық конкурс жариялайды, деп хабарлайды Dauletten.kz Нұр-Сұлтан қаласы әкімдігінің ресми сайтына сілтеме жасап.

Гранттар кәсіпкерлікті қолдау мақсатында «Бизнестің жол картасы-2025» бағдарламасы аясында шағын кәсіпкерлік нысандарына, атап айтсақ, ісін жаңа бастаған жас кәсіпкерлерге қайтарымсыз негізде беріледі.

Байқауға қатысу үшін өтінімдер "Qoldau" платформасы арқылы қабылданады. Кәсіпкерлердің платформада өз бетінше тіркелу үшін ЭЦҚ болуы тиіс. Құжаттарды қабылдау уақыты 28 маусымнан 12 шілдеге дейін жалғасады.

Жаңа бизнес-идеяларды іске асыру үшін мемлекеттік гранттарды алуға үміткер кәсіпкерлер өтінімге төмендегідей құжаттар тізімін өткізуі керек:

• Мемлекеттік гранттар беру қағидаларына сәйкес дайындалған бизнес-жоба;
• басшының қолымен және өтініш берушінің мөрімен расталған, өтінім беру кезіндегі жалдамалы жұмыскерлердің орташа саны туралы анықтама (бар болса);
• Бағдарлама және (немесе) Қазақстан Республикасы Үкіметінің 2018 жылғы 13 қарашадағы № 746 қаулысымен бекітілген Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған "Еңбек" бағдарламасы шеңберінде кәсіпкердің оқудан өткенін растайтын, ескіру мерзімі 2 (екі) жылдан аспайтын құжат;
• Берілетін мемлекеттік грант көлемінің кемінде 10 % мөлшерінде бизнес-жобаны іске асыруға арналған шығыстарды (бизнес-жобаға қатысатын ақша қаражатымен, жылжымалы/жылжымайтын мүлікпен) қоса қаржыландырудың болуын растайтын құжаттар, кәсіпкердің ағымдағы шотында ақша қаражатының болуы туралы банктік шоттан үзінді көшірме немесе бизнес-жобаға қатысатын жылжымалы және/немесе жылжымайтын мүліктің бағалау құнын растайтын құжаттар (халықтың әлеуметтік осал топтарын қоспағанда);
• Өтініш берушіде халықтың әлеуметтік осал топтарына жатқызылу мәртебесінің бар екенін растайтын құжат.