|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Вице-премьер, ұлттық экономика министрі Серік Жұманғарин қосылған құн салығының (ҚҚС) жаңа мөлшерлемесіне қатысты түсініктеме берді, - деп хабарлайды Dauletten.kz.
Үкімет отырысында Жұманғарин ҚҚС мөлшерлемесін 16 пайызға дейін көтеру және саралау бюджеттің мұнай кірісіне тәуелділігін төмендетуге, Ұлттық қордың жинақтау қызметін нығайтуға және басым мемлекеттік жобаларды қаржыландыруға мүмкіндік беретінін атап өтті.
Министрдің айтуынша, ауыл шаруашылығы өнімдерін өндірушілерді ҚҚС-тан босату жоспарланып отыр.
- Қазір шаруа қожалықтары ҚҚС төлемейді, біз бұл тәртіпті сақтаймыз. Ал заңды тұлғалар – ауыл шаруашылығы тауарын өндірушілер бұрын бюджетке төлеуі тиіс болған ҚҚС-тың 30 пайызынан босатылады. Бұл Қазақстанда өндірілген өнімдердің (картоп, қызанақ, пияз, қырыққабат және т.б.) бәсекеге қабілеттілігін арттырады. Денсаулық сақтау саласына 10 пайыздық төмендетілген мөлшерлеме енгізу ұсынылады. Бірақ бұл тек медицинамен шектеле ме, жоқ па – қосымша талқыланады. Басқа да қызмет түрлері бойынша барлық ұсыныстар жиналып, сарапшылар мен бизнес өкілдерімен бірлесе қарастырылады, – деп түсіндірді Жұманғарин.
Министрдің айтуынша, салық мөлшерлемесі жоғары болған сайын есепке алу мен декларациялау күрделене түседі.
- Мұның алдын алу үшін біз 16 пайыз, 10 пайыз, 0 пайыз және толық босату сияқты салық мөлшерлемелерін енгізуді ұсынамыз. Қазіргі уақытта кәсіпорындардың тек 4 пайызы ҚҚС төлейді, ал көптеген компания салықтан жалтаруда. Бұл салық жүйесіне кері әсер етіп, ҚҚС есебін жүргізуді қиындатады. Сондықтан ҚҚС есебіне қою шегін 80 миллион теңгеден 15 миллион теңгеге дейін төмендету ұсынылады, – деді ол.
