|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Қазақ қашанда ата кәсібі жылқы өсіруді басқа шаруашылықтан жоғары қояды. Сондықтан Ауыл шаруашылығы министрлігі 140 мың теңге көлеміндегі субсидияны жылқыға емес, шошқаға бөлетіні көпшілікті қынжылтты. Осы жағдай кешеден бері желіде қызу талқыға түсті.
Министрлік мәселенің мәнісі жылқы етінің көбіне ішкі нарықта ғана сұранысқа ие болуында деп түсіндіреді. Ал шошқаға шетелден де сұраныс бар. Десе де, ол мемлекет тарапынан жылқы шаруашылығына көмек көрсетілмейді деген сөз емес. Жылқы саны мемлекет жасаған субсидия мен қолдаудың әсерінен кеңес кезеңімен салыстырғанда 1,7 есе көбейіп, жыл басындағы мәліметтерге сәйкес, 2,9 миллионға жеткен.
Мемлекет асыл тұқымды айғырларды сатып алғандарға басына 100 мың теңгеден, бие сүтін өндірумен айналысатындар үшін литріне 60 теңгеден субсидия бөледі. Жыл сайын асыл тұқымды жылқының аналығының жем-шөбіне 20 мың теңге қаражат және жылқы шаруашылығын дамытуға бағытталған жабдық-техникаларды алуға инвестициялық субсидия (өтеу үлесі – 25%) да беріледі. Сондай-ақ лизинг пен несие бойынша пайыздық мөлшерлемелерді 10% субсидиялау қарастырылған. 2019 жылы соның арқасында 4,7 мың жылқы фермасы мемлекет қолдауын пайдаланды. Онымен қоса, жылқыны 10 жылға дейін 6 пайыздық несие алу арқылы сатып алуға болады.
Ал шошқа шаруашылығына оралар болсақ, қазіргі уақытта аталған салада тек екі субсидия бар. Себебі 2018 жылдан шошқа етін өндіруді субсидиялау қысқарған. Оның үстіне, Ауыл шаруашылығы министрлігінің баспасөз хатшысы Жанжігіт Омарханның айтуы бойынша, бұл субсидияны былтыр жалғыз шаруашылық қана пайдаланған. Аталған шаруа қожалығы шетелден 6 шошқа әкеліп, 840 мың теңге алған көрінеді. Сондықтан министр Facebook парақшасында «тиімсіз субсидия» туралы босқа байбалам салудың қажеті жоғын айтады.
Ауыл шаруашылығы министрлігінің шошқа санына қатысты мәліметі бойынша, 1991 жылы Қазақстанда шошқа басы 2,9 миллион болса, 2018 жылы 800 мыңды құраған.
Десе де, экспорттың өсуіне байланысты елімізде шошқа санының артуы байқалады. 2017 жылы Қазақстан экспортқа 300 тоннаға жуық шошқа етін шығарса, былтыр шетелге 800 тонна шошқа еті сатылды.
