|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Танымал этнограф, жазушы, астролог әрі ғалым Болат Бопай өмірден озды. Қаралы хабарды журналист Біләл Қуаныш Instagram парақшасында жеткізді, - деп хабарлайды Dauletten.kz.
Өмірбаяны
Болат Бопайұлы 1960 жылғы 1 қаңтарда Қытай Халық Республикасының Шыңжаң өлкесі, Алтай аймағы, Көктоғай ауданындағы Қуертіс қаласында дүниеге келген.
Білімі мен қызмет жолы:
1967-1977 жылдары Көктоғай ауданында қазақ тілінде білім алды.
1978-1981 жылдары Шыңжаң “Дене тəрбие саңлағы” журналында жауапты редактор қызметін атқарды.
1982-1986 жылдары Күйтін қаласындағы Іле педагогикалық институтының Қазақ тілі мен әдебиеті факультетінде оқыды.
1986-1992 жылдары Үрімжі қалалық №36 орта мектепте қазақ тілі мен әдебиетінен сабақ беріп, әдебиет бөлімінің меңгерушісі болды.
1993-1994 жылдары Шыңжаң жастар-өрендер баспасында қазақ редакциясының бөлім меңгерушісі әрі “Ғылым бұлағы” журналының жауапты редакторы қызметін атқарды.
1995-1998 жылдары Қазақстанға қоныс аударып, әл-Фараби атындағы Қазақ ұлттық университетінде (ҚазҰУ) аспирантурада білім алды.
1999-2004 жылдары Қазақ радиосының “Шалқар” бағдарламасында редакторлық қызметте болды.
2005-2012 жылдары жеке шығармашылықпен айналысты.
2013-2018 жылдары “Қазақстан” телеарнасындағы “Айтуға оңай” ток-шоуының бас кеңесшісі әрі сценаристі болды.
2019-2020 жылдары Алматы қаласындағы №107 лицейде қазақ әдебиетінен сабақ берді.
Шығармашылық жолы:
Болат Бопайұлы 11 жасынан бастап шығармашылықпен айналысқан. Оның алғашқы өлеңі — “Арманым бар” 1977 жылы “Алтай” газетінде жарық көрді.
Ол Қазақ тілі мен әдебиеті бойынша 30-дан астам оқу құралын әзірлеп, бастауыш, орта мектептер мен жоғары оқу орындарына арналған оқулықтар жазды. Сонымен қатар этнография саласында да мол мұра қалдырған. Оның қаламынан “Қазақ кәдесі”, “Қазақ мінезі”, “Қазақ аспан есебі”, “Қазақтың алғыстары мен қарғыстары”, “Салт-дәстүр сөйлейді”, “Қазақ жоқтау жырлары”, “Қазақтың өлшем-мөлшер сөздері” сынды көптеген еңбектер туған.
Ғылыми және қоғамдық қызметі:
Болат Бопайұлы елге оралған соң, қазақтың салт-дәстүрі тақырыбында 2150 сағаттан астам дәріс оқыды. Этнографиялық тақырыпта мыңға жуық ғылыми мақаласы жарық көрді.
Ол — Қазақстан Жазушылар одағының, Қазақстан Журналистер одағының мүшесі, Қазақ ұлттық салт-дәстүр, әдет-ғұрып академиясының академигі. ҚР “Мәдениет үздігі” төсбелгісінің иегері, Қазақстанның құрметті азаматы, “Қазақ халықаралық туристік кешені” жобасының патент иесі, “Қазақ киіз үйі — ғалам моделі” кітабының авторы.
Болат Бопайұлының шығармашылық және ғылыми мұрасы қазақ мәдениеті мен әдебиетінде өшпес із қалдырды.
