Жаңалықтар

13,5 млн тонна экспорт: Қазақстанның астығы бұрын-соңды болмаған көлемде сатылды

23.07.2026

мин

0

114

Сурет: Ғаламтордан

Қазақстанның астық және ұн экспорты соңғы маусымда бұрын-соңды болмаған көрсеткішке жетті. Бір жылға жетер-жетпес уақытта шетелге 13,5 млн тонна өнім жөнелтіліп, өткен маусымның нәтижесі 16%-ға артта қалды. Сарапшылар мұны жай ғана мол өніммен емес, Қазақстанның аймақтағы азық-түлік қауіпсіздігін қамтамасыз етудегі рөлінің күшеюімен байланыстырады, —леп хабарлайды Dauletten.kz.

Қазақстан әлемдік астық нарығындағы орнын біртіндеп күшейтіп келеді. 2025 жылғы қыркүйектен 2026 жылғы 17 шілдеге дейін елден экспортталған астық пен астыққа шаққандағы ұн көлемі 13,5 млн тоннаға жетіп, жаңа рекорд тіркелді. Бұл өткен экспорттық маусымдағы 12 млн тоннамен салыстырғанда 16%-ға жоғары.

Экспорттың негізгі өсімі көрші мемлекеттердің сұранысымен байланысты болды. Әсіресе Өзбекстан, Ауғанстан, Қырғызстан және Түрікменстан қазақстандық астықты бұрынғыдан да көп сатып ала бастады.

Нақтырақ айтқанда, Өзбекстанға жөнелтілген өнім көлемі 37%-ға өсіп, 5,6 млн тоннаға жетті. Қырғызстанға экспорт 1,4 есеге артып, 504 мың тоннаны құрады. Ауғанстанға жеткізілім 59%-ға көбейіп, 2,2 млн тоннаға жетсе, Түрікменстанға экспорт 34%-ға өсіп, 210 мың тонна болды.

Ауыл шаруашылығы министрлігі бұл көрсеткіштерді қазақстандық өнімнің бәсекеге қабілеттілігі мен экспорттық бағыттағы логистиканың жақсаруының нәтижесі деп бағалайды. Ведомствоның мәліметінше, шетелдік серіктестермен сауда байланысының кеңеюі де экспорт қарқынын арттыруға ықпал еткен.

Алайда бұл көрсеткіштің тағы бір қыры бар. Көпшілік назар аудармайтын жайт – Қазақстан барған сайын өңірдің азық-түлік тұрақтылығына жауапты елдердің біріне айналып келеді. Көрші мемлекеттердегі өндірістің құбылуы мен климаттық тәуекелдер күшейген сайын олардың қазақстандық астыққа тәуелділігі де артып отыр. Бұл экспорт үшін тиімді болғанымен, ішкі нарықтағы баға тұрақтылығын сақтау мәселесін де қатар күн тәртібіне шығарады.

Айта кетейік, бұған дейін 2026 жылдың бірінші тоқсанында елде 4,1 млн тонна астық тасымалданғаны хабарланған еді. Оның 3,2 млн тоннасы экспортқа жөнелтілсе, 900 мың тоннасы ішкі нарыққа жеткізілген. Бұл көрсеткіш өткен жылдың сәйкес кезеңінен 15%-ға жоғары болған.