«Әділет» партиясы Құрылтайдың I шақырылымындағы депутаттық мандаттарды бөліп, 110 кандидаттың тізімін бекітті. Олардың арасында бұрынғы Мәжіліс пен Сенат депутаттары, Ұлттық Құрылтай мүшелері және Президенттік жастар кадр резервінің өкілдері бар, — деп хабарлайды Dauletten.kz.
Астанада «Әділет» партиясы Саяси кеңесі Бюросының отырысы өтіп, онда Құрылтайдың I шақырылымына сайланған депутаттардың тізімі бекітілді. Партия төрағасы Айбек Дәдебайдың төрағалығымен өткен жиында тиісті шешім қабылданды.
Партия сайлау нәтижесінде 145 депутаттық мандаттың 110-ын иеленген. Сайлаушылардың 71,17 пайызы «Әділет» партиясына дауыс берген. Партия мәліметінше, оны 6,5 миллионнан астам қазақстандық қолдаған.
110 депутаттың құрамына назар аударсақ, 37-сі әйел, 13-і жастар санатына жатады. Сондай-ақ екі депутаттың мүгедектігі бар. 21 депутат – өзге ұлт өкілдері. Депутаттардың орташа жасы 46,7 жасты құрайды.
Жаңа құрамда тәжірибелі саясаткерлер де аз емес. Олардың арасында Ұлттық Құрылтайдың 13 бұрынғы мүшесі, Мәжілістің 20 экс-депутаты және Сенаттың төрт бұрынғы депутаты бар. Жалпы 24 адамның Парламентте депутаттық тәжірибесі болған.
Құрамда мемлекеттік басқару мен саясаттан бөлек, түрлі саланың мамандары да бар. Атап айтқанда, партия тізіміне төрт IT маманы, үш эколог және волонтерлік қозғалыстың екі өкілі енген.
Сонымен қатар 10 кандидат Президенттік жастар кадр резервінің мүшесі болса, төртеуі Президент жанындағы Жастар саясаты жөніндегі кеңесте жұмыс істеген. Бес адам Президент жанындағы Әйелдер істері және отбасылық-демографиялық саясат жөніндегі ұлттық комиссия құрамында болған. Тағы 26 кандидат мәслихат депутаты ретінде тәжірибе жинаған.
Партия Бюросы Құрылтайдағы депутаттық фракция жұмысының негізгі тәртібін де бекітті. Енді 110 кандидаттың тізімі Құрылтайдың бірінші шақырылымы депутаттарын ресми тіркеу үшін Орталық сайлау комиссиясына жолданады.
Партия басшылығы сайлау нәтижесін азаматтардың «Әділетке» және елдегі реформалар бағытына білдірген сенімінің көрсеткіші ретінде бағалап отыр. Ендігі мәселе – жоғары қолдауды депутаттардың нақты жұмысы мен қабылданатын шешімдер арқылы ақтауы.
