Жаңалықтар

АЭС құрылысына 818 млрд теңге: Қазақстан бюджеті бұл ақшаны қалай жұмсамақ?

03.09.2026

мин

0

150

Сурет: BAQ.kz

Қазақстан алғашқы атом электр станциясының құрылысына алдағы үш жылда 818,3 млрд теңге бағыттауды жоспарлап отыр. Қаражат жыл сайын кезең-кезеңімен бөлініп, АЭС операторының капиталына құйылмақ, — деп хабарлайды Dauletten.kz.

Қазақстанның алғашқы АЭС жобасы үшін бюджеттен қомақты қаржы қарастырылып отыр. 2027–2029 жылдары «Қазақстандық атом электр станциялары» ЖШС-нің жарғылық капиталын ұлғайтуға жалпы 818,3 млрд теңге бағытталмақ.

Қаражат үш жылға бөлінген:

• 2027 жылы – 247,9 млрд теңге;
• 2028 жылы – 303,1 млрд теңге;
• 2029 жылы – 267,3 млрд теңге.

Бұл ақшаны кәдімгі мемлекеттік шығынмен шатастырмау керек. Қаржы бюджеттің қаржылық активтерге қатысты бөлігі арқылы беріледі. Яғни мемлекет АЭС жобасына ақша салып, оның операторындағы өз активін ұлғайтады.

Жобаның ауқымын басқа көрсеткіштерден де көруге болады. Бұған дейін Атом энергиясы агенттігі алғашқы АЭС-тің болжамды құнын шамамен 16,4 млрд доллар деп бағалаған. Станция екі энергоблоктан тұрады деп жоспарланған. 

АЭС құрылысының белсенді кезеңі 2027 жылы басталуы жоспарланған. 

Мұндағы назар аударарлық жайт — бюджет жобасында АЭС операторына капитал ұлғайтуға арналған 818,3 млрд теңгелік бағдарлама ең ірі қаржылық бағыттардың біріне айналып отыр. Сондықтан алдағы үш жылдағы бюджетте атом энергетикасына қанша қаражат бағытталатыны қоғам назарында болмақ.

Бұған қоса, АЭС жобасын қаржыландырудың негізгі бөлігі Ресейдің экспорттық несиесі есебінен жүзеге асырылатыны айтылған. Бұған дейін жоба бойынша қаржыландырудың 85%-ын несие, 15%-ын Қазақстан тарапы қамтамасыз етуі мүмкін екені хабарланған. 

Қазір жоба «Балқаш» атауымен Үлкен ауылы маңында жүзеге асырылмақ. Станцияның құрылысы аяқталғаннан кейін Қазақстанның энергетикалық жүйесіне жаңа ірі қуат көзі қосылуы көзделіп отыр.