Жаңалықтар

Алматы облысында алименттен жалтарған 95 борышкер қамалды

15.04.2026

мин

1

149

Сурет: zakon.kz

Алматы облысында алименттен жалтарған 95 адам жауапқа тартылды, — деп хабарлайды Dauletten.kz. 

Алматы облысында алимент төлеуден жалтарған 95 борышкер әкімшілік жауапкершілікке тартылып, қамауға алынды. Бұл туралы облыстық прокуратура мәлім етті.

Ведомствоның дерегінше, соңғы үш ай ішінде өңірде алимент бойынша жалпы 500 миллион теңгеге жуық берешек өтелген. Балалар алдындағы міндетін орындаудан қасақана бас тартқан 13 азаматқа қатысты қылмыстық іс қозғалып, олардың үшеуіне сот үкімі шыққан. Қалғандары бойынша тергеу жалғасуда.

Сонымен қатар, 107 борышкер әкімшілік жауапкершілікке тартылып, олардың 95-і бес тәулікке дейін әкімшілік қамауға алынған.

Алимент қарызын өтеу мақсатында жалпы құны 32 миллион теңгеге жуық мүлік — жер телімдері, тұрғын үйлер мен автокөліктер балалардың пайдасына берілген. Бір жағдайда борышкер 7,5 миллион теңге тұратын жер учаскесін қарызды өтеу үшін өткізген.

Прокуратура өкілдері мұндай шаралар алимент төлеуден жалтаруға жол берілмейтінін көрсететінін атап өтіп, балалардың құқықтары мен әл-ауқатын қорғау басты басымдық екенін жеткізді.