Жаңалықтар

Алматы – Ташкент пойызында әйелдер вагоны іске қосылады

27.08.2026

мин

6

118

«Жолаушылар тасымалы» АҚ 2026 жылғы 1 қазаннан бастап алғаш рет №1/2 «Алматы – Ташкент» халықаралық пойызы құрамында әйелдер вагоны қызметін іске қосады, - деп хабарлайды Dauletten.kz.

Жаңа қызмет Қазақстан мен Өзбекстан арасындағы жолаушылар қатынасын дамыту және бағытқа сұраныстың артуына байланысты енгізіліп отыр. Осылайша, әйелдер вагоны қатынайтын бағыттар саны 14-ке жетеді.

Әйелдер вагонында билеттер тек әйелдерге сатылады, ал жолаушыларға әйел жолсеріктер қызмет көрсетеді. Сонымен қатар, ересек адамның еріп жүруімен жеті жасқа дейінгі ұл балаларды алып жүруге рұқсат етіледі.

№1/2 «Алматы – Ташкент» пойызы күн сайын қатынайды. Алматыдан 19:05-те жөнеліп, Ташкентке 12:53-те келеді. Кері бағытта пойыз Ташкенттен 14:41-де шығып, Алматыға 08:51-де жетеді.

Билеттерді теміржол кассаларынан немесе bilet.railways.kz ресми сайты арқылы онлайн сатып алуға болады. Билет рәсімдеу кезінде орынның әйелдер вагонына тиесілі екенін білдіретін «ЖН» белгісіне назар аудару қажет.

Билеттер пойыз жөнелтілетін күнге дейін 45 тәулік бұрын сатылымға шығарылады. Бұл жолаушыларға сапарын алдын ала жоспарлауға мүмкіндік береді.