Жаңалықтар

Алматыда адамтәрізді роботтар шығаратын зауыт салынады

17.07.2026

мин

0

61

Сурет: Egemen.kz

Алматы робототехника картасында жаңа нүктеге айналмақ. Әлемдегі жетекші UBTECH Robotics компаниясы Қытайдан тыс алғашқы өндіріс орнын дәл Қазақстанда ашуға шешім қабылдады. Сарапшылар мұны жай ғана зауыт емес, өңірдегі технологиялық ықпал үшін басталған бәсекенің белгісі деп бағалайды, — деп хабарлайды Dauletten.kz.

Алматыда гуманоидты және білім беру бағытындағы роботтарды шығаратын жаңа зауыт салынады. Тиісті келісім Шанхайда өткен бизнес-форум аясында Алматы әкімдігі, Nero Robotics және UBTECH Robotics компаниясының негізін қалаушы Чжоу Цзянь арасында жасалды.

Қала әкімдігінің мәліметінше, Алматы – UBTECH Robotics өзінің алғашқы шетелдік өндіріс алаңын іске қосатын қала. Құрылыс жұмыстары басталып кеткен, ал кәсіпорынды 2027 жылдың бірінші тоқсанында пайдалануға беру жоспарланып отыр.

Жоба аясында тек роботтар өндірісі ғана емес, инженерлік және ғылыми-зерттеу орталығы ашылады. Сондай-ақ қазақстандық мамандарды робототехника саласында даярлау, жаңа технологияларды енгізу және инженерлік құзыреттілікті дамыту көзделген.

Бұл шешімнің астарында тек инвестиция емес, стратегиялық есеп те жатыр. Әлемде жасанды интеллект пен робототехникаға сұраныс күрт өсіп жатқан кезеңде халықаралық компаниялар өндірісті әртараптандыруға көшуде. Қазақстанның географиялық орналасуы мен өңірлік нарықтарға шығу мүмкіндігі Алматыны жаңа технологиялық хаб ретінде қарастыруға жол ашып отыр.

Егер жоба толық жүзеге асса, Қазақстан алғаш рет дайын технологияны тұтынушы ғана емес, жоғары технологиялық өнім шығаратын мемлекеттердің қатарына жақындай түседі. Бұл елдің робототехника саласындағы әлеуетін арттырып, инженер мамандарға жаңа мүмкіндіктер ашуы мүмкін.