|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Алматыда эконом-класс санатындағы үйлерді салуға тыйым салынбақ. Бұл туралы қала әкімі Ерболат Досаев Орталық коммуникациялар қызметінде өткен баспасөз мәслихатында мәлімдеді, - деп хабарлайды Dauletten.kz.
Әкімнің айтуынша, жыл соңына дейін Алматы қаласының мәслихаты жаңа қала құрылысы регламенті мен құрылыс ережелерін бекітуі қажет.
- Алматыда III класстан төмен тұрғын үйлер салуға рұқсат берілмейді. Барлық тұрғын үй аудандары мен аулалық аумақтарда ғимараттарды нүктелік орналастыруға тыйым салынады. Сонымен қатар эконом-класс санатындағы үйлерді салу жаңа ережелерге сай тоқтатылады. Krisha.kz мәліметіне сәйкес, жаңа талаптарға сәйкес бір бөлмелі пәтердің ауданы кем дегенде 35 шаршы метр, екі бөлмелі пәтер – 55 шаршы метр, ал үш бөлмелі пәтер – 68 шаршы метр болуы керек. Сондай-ақ пәтер төбесінің биіктігі 2,7 метрден төмен болмауы тиіс. Әр пәтерде міндетті түрде балкон немесе лоджия болуы шарт, ал ғимараттардың өзінде көлікке арналған тұрақ орындары қарастырылуы қажет, – деді Ерболат Досаев.
Әкімнің айтуынша, Абай және әл-Фараби даңғылдарының аралығында ерекше жобалардан басқа, тоғыз қабаттан жоғары ғимараттар салуға тыйым салынады. Тұрғын үйлерді тауға жақын аумақтарда, жасыл аймақтарда және аулаларда салу да шектеледі.
Сонымен қатар Шығыс айналма жолы, Әл-Фараби даңғылы, Саин және Жандосов көшелерінің оңтүстігінде, тау етектерінде және 15 градустан асатын тік еңістігі бар жерлерде құрылыс жүргізуге рұқсат етілмейді.
- Егер мәслихат жаңа қала құрылысы регламенті мен құрылыс ережелерін бекітсе, біз Алматыда құрылыс жүргізудің негізгі шарттарын нақтылаймыз. Бұл ретте реттеу аймағынан тыс қалып, тауларды кесіп, үйлер салып жатқан жеке тұлғалардың мәселесін шешеміз. Бұл, ең алдымен, олардың қауіпсіздігін қамтамасыз ету үшін маңызды, – деді қала әкімі.
Егер жаңа ережелер қабылданса, олар 2025 жылдың қаңтарынан бастап күшіне енеді.
