Спорт

“Астана” мен “Челси” ойынына байланысты Алматыда Орталық стадионға тегін автобустар ұйымдастырылады

10.12.2024

1 мин

0

129

Сурет: zakazbiletov.kz

"Астана" мен "Челси" ойынына байланысты Алматыда Орталық стадионға тегін автобустар ұйымдастырылады, - деп хабарлайды Dauletten.kz.

12 желтоқсан күні сағат 20:30-да Алматы қаласының Орталық стадионында UEFA Конференция лигасы аясында "Астана" мен "Челси" футбол командаларының кездесуі өтеді.

Футбол жанкүйерлері үшін стадионның есігі 18:00-де ашылады. Алматы қаласының әкімдігі жанкүйерлерге стадионға кіру кезінде кептеліс болмас үшін ертерек келуді және қоғамдық көліктерді пайдалануды ұсынады.

Көлік қозғалысын шектеу:

Қалалық әкімдіктің ресми мәліметі бойынша, көлік кептелісін болдырмау мақсатында 12 желтоқсан күні сағат 18:30-дан 00:00-ге дейін Абай даңғылының Байтұрсынов көшесінен Мұқанов көшесіне дейінгі аралығында қозғалыс шектеледі. Сонымен қатар, Байтұрсынов көшесінен Байзақов көшесіне дейінгі Сәтбаев көшесі толық жабылады. Жақын маңдағы көшелерде патрульдік полиция бекеттері жұмыс істейді.

Тегін автобустар:

Жанкүйерлердің стадионға және кері қайтуын жеңілдету үшін 8 тегін автобус маршруты ұйымдастырылады. Әр маршрутта 10 автобус қызмет көрсетеді. Жиналу нүктелерін 2GIS сервисі арқылы анықтауға болады.

Автобус бағыттары:

• Қалқаман шағын ауданы (№7 қалалық аурухана аялдамасы) – Орталық стадион.
• Орбита шағын ауданы (Мұстафин-Торайғыров қиылысы) – Орталық стадион.
• Айнабұлақ шағын ауданы (Мақатаев-Павлодар қиылысы) – Орталық стадион.
• "Халық Арена" аялдамасы (солтүстік бағыт) – Орталық стадион.
• Алматы-1 теміржол вокзалы – Орталық стадион.
• "Райымбек батыр" метро бекеті – Орталық стадион.
• Наурызбай ауданы ХҚКО аялдамасы – Орталық стадион.
• Момышұлы-Мөңке би қиылысы – Орталық стадион.

Автобустар сағат 16:00-ден бастап толуына қарай жолға шығады.

Қосымша ақпарат:

• 12 желтоқсан күні ауа райы шамамен -11 градус болады деп болжануда. Сондықтан жылы киім кию ұсынылады.
• Қауіпсіздік талаптарына сәйкес, стадион аумағына термос алып кіруге тыйым салынады.
• Стадионда ыстық сусындар мен жеңіл тағамдар сатылатын арнайы сауда нүктелері жұмыс істейді.
• Стадион маңында 60 биодәретхана, оның ішінде мүмкіндігі шектеулі жандарға арналған дәретханалар орнатылады.

Әкімдік жанкүйерлерге барлық қажетті жағдай жасалатынын хабарлады.