Жаңалықтар

Астанада тандырханада газ баллоны жарылды: зардап шеккендер бар

16.07.2026

мин

0

122

Сурет: t.me/astanovka98

Астанадағы “Сапа” базары аумағында орналасқан тандырханада газ баллоны жарылып, бірнеше адам зардап шекті. Жарылыс салдарынан ғимараттың бір бөлігі қирап, жақын маңда тұрған көлікке де зақым келген, — деп хабарлайды Dauletten.kz.

Астанада таңертең базар аумағындағы тандырханада болған жарылыс жұртты дүрліктірді. Полицияның мәліметінше, оқиға туралы хабар 08:55-те түскен. Жарылыс Жиенқұлов көшесіндегі “Сапа” базары аумағында орналасқан нысанда болған.

Алдын ала мәлімет бойынша, тандырхананың ішінде тұрған көлемі 50 литрлік газ баллоны жарылған. Күшті жарылыстан ғимараттың төбесінің бір бөлігі құлап, есік ойығы бүлінген. Сондай-ақ жарылыс толқыны маңда тұрған Toyota автокөлігіне зақым келтірген.

Оқиға салдарынан төрт адам түрлі дене жарақатын алып, ауруханаға жеткізілді. Олардың арасында тандырханада жұмыс істеген 41 және 19 жастағы Өзбекстан азаматтары, сондай-ақ 16 жастағы жасөспірім мен 27 жастағы Қазақстан азаматы бар. Дәрігерлер тағы бір адамды оқиға орнында тексеріп жатыр.

Мұндай оқиғалар газ баллондарын пайдалану кезінде қауіпсіздік талаптарын сақтаудың қаншалықты маңызды екенін тағы бір мәрте көрсетті. Әсіресе қоғамдық тамақтану орындарында газ жабдықтарының техникалық жағдайын тұрақты тексеру – адам өміріне төнетін қауіптің алдын алудың басты шарты. Қазір оқиғаның нақты себебін құзырлы органдар анықтап жатыр.