Жаңалықтар

Астанада жаңа нысандар бой көтереді: ондаған жер телімі иеліктен шығарылады

20.07.2026

мин

0

254

Сурет: АШМ

Астана қаласының әкімдігі бірқатар аумақтағы жер учаскелерін мемлекеттік қажеттілікке байланысты мәжбүрлеп иеліктен шығару туралы шешім қабылдады, - деп хабарлайды Dauletten.kz.

Қаулыға сәйкес, Есіл ауданында Д. Қонаев пен Сарайшық көшелерінің аралығында орналасқан 26 жер учаскесі сатып алу арқылы мемлекет меншігіне қайтарылады. Жалпы аумағы 7,6 гектардан асатын бұл аумақ қонақүй құрылысы жобасына байланысты белгіленген.

Иеліктен шығару рәсімі 2026 жылғы 3 тамыздан 2027 жылғы 3 тамызға дейінгі кезеңде жүргізіледі. Жер иелері мен пайдаланушыларға әкімдікке өтініш беру арқылы өтемақы және келісу рәсімдеріне қатысты келіссөздерді бастау мүмкіндігі қарастырылған. Бұл үшін хабарлама алған күннен бастап 15 күнтізбелік күн ішінде тиісті өтініш тапсыру қажет.

Сонымен қатар, қала әкімдігі Заречный тұрғын алабындағы Үшқопыр және Қаратөбе көшелерінің маңындағы 10 жер учаскесін де мемлекеттік қажеттілік үшін сатып алу туралы шешім шығарды. Аумағы 2,3 гектардан асатын бұл жерлерде болашақ мектеп құрылысына қажетті инженерлік іздестіру және жобалау жұмыстары жүргізіледі.

Әкімдік қабылдаған бұл шешімдер елордадағы инфрақұрылымдық және құрылыс жобаларын жүзеге асыру мақсатында қолға алынған.