|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Атырау облысында жұмысшы жастар кеңесі қайта жанданып, өңірдің өндіріс орындары мен кәсіпорындарында еңбек ететін жас мамандар үшін маңызды алаңға айналып отыр. Бұл жоба Атырау облысы ішкі саясат басқармасының тапсырысымен, "Азаматтық бастамаларды қолдау орталығы" КЕАҚ қолдауымен және "Алматы студенттер Альянсы" КҚ ұйымдастыруымен "Active youth" жобасы аясында іске асырылып жатыр, - деп хабарлайды Dauletten.kz.
Кеңестің негізгі мақсаты – жастардың кәсіби дамуына ықпал етіп, олардың әлеуметтік бастамаларын қолдау, сондай-ақ өңірлік мәселелерді шешуге жастардың тікелей қатысуына мүмкіндік беру.
Жоба шеңберінде өткен фасилитациялық сессияға аймақтағы жетекші компаниялардың жұмысшы жастары қатысып, өзекті мәселелерді талқылап, шешу жолдарын қарастырды. Іс-шараға "ҚазТрансОйл" АҚ Атырау мұнай құбыры басқармасы, "Интергаз Орталық Азия" АҚ "Атырау" МГҚБ, "Qazaqgaz Aimaq" АҚ Атырау өндірістік филиалы, "QazaqGaz Onimderi" ЖШС Атырау филиалы, "Самұрық-Қазына" АҚ Атырау облысы бойынша жастар кеңесі белсенділері және "Karabatan Utility Solutions" ЖШС сынды ірі кәсіпорындардан өкілдер қатысты.
Кездесуде қатысушылар аймақтағы еңбек жағдайлары, кәсіби даму мүмкіндіктері мен жастардың әлеуметтік қажеттіліктері туралы пікір алмасты. Жас мамандар өз тәжірибелерімен бөлісіп, жастарды жұмыс барысында туындайтын қиындықтарды жеңуге және еңбек тиімділігін арттыруға шақырды. Сонымен қатар" жастар кеңесі жас мамандардың кәсіби өсуі үшін маңызды дағдыларды меңгеруге бағытталған тренингтер мен шеберлік сыныптарын, түрлі оқу бағдарламаларын ұйымдастыруды қолға алды.
Бұл бастама жұмысшы жастардың өзін-өзі дамытуына, кәсіби тұрғыда өсуіне қолдау көрсетіп қана қоймай, олардың әлеуметтік жауапкершілік сезімін нығайтуға бағытталған. Кеңес жұмысы арқылы жастар өз идеяларын ұсынып, кәсіби өсу мүмкіндіктерін кеңейтеді, сондай-ақ қоғамдық мәселелерге қатысты пікірлерін білдіре алады. Бұл жастарды болашақта аймақтың әлеуметтік және экономикалық өміріне белсенді араласуға ынталандырады.
Жоба аясында ұйымдастырылатын іс-шаралар аймақтың дамуына ықпал етуге бағытталғандықтан, кеңестің алдағы жоспарлары ауқымды. Болашақта жастар кеңесі өңірдегі кәсіпорындармен және мемлекеттік мекемелермен бірлесіп, жас мамандардың еңбек құқықтарын қорғау және олардың біліктілігін арттыру бағытындағы жұмысты жалғастырмақ. Жұмысшы жастар кеңесі аймақтағы жастардың мүддесін қорғауға, кәсіби тұрғыда жетілдіруге және өңірдің дамуына қосатын үлестерін арттыруға мүмкіндік береді.
Бұл бастама – Атырау облысындағы жастардың әлеуметтік және кәсіби дамуына серпін беретін, олардың қоғамдағы рөлін нығайтуға ықпал ететін маңызды жоба. Кеңес жұмысы жастардың қоғамдық өмірге белсене араласуына, өздерін өңірдің дамуына қатысты сезінуіне жағдай жасап, олардың жеке және кәсіби мақсаттарына жетуге қолдау көрсетуді көздейді.
Еске сала кетейік, Мемлекет басшысы Қасым-Жомарт Тоқаев жолдауда 2025 жыл Қазақстанда Жұмысшы мамандықтар жылы ретінде жариялады. Бұл шешім ел экономикасының дамуына жұмысшы мамандықтардың маңызды рөл атқаратынын көрсетеді.
