Жаңалықтар

Баспана алу үшін берілетін сертификат сомасы өседі

09.12.2020

1 мин

142

18825

Елордада азаматтарға бастапқы жарна ретінде берілетін тұрғын үй сертификаттарының сомасы 1,5 млн теңгеге өседі. Бұл туралы Нұр-Сұлтан қаласының әкімі Алтай Көлгінов айтты.

Оның айтуынша, баспана алуға берілетін сертификаттарды алатын азаматтар саны артты. Бұған дейін тек үш санатқа жататын адамдарға табысталса, енді тұрғын үй кезегінде тұрған тоғыз санат бойынша да сертификаттар беріледі.

"Келер жылдан бастап сертификат бағасын 1 млн теңгеден 1,5 млн теңгеге дейін ұлғайту жоспарланып отыр. Сондай-ақ әлеуметтік пәтер алушылар санатын кеңейттік. Енді азаматтар баспана алу үшін алғашқы жарна 1,5 млн теңгенің сертификаттарын ала алады", - деді ол.

Еске сала кетейік, осы уақытқа дейін тұрғын үй сертификаты толық емес, көпбалалы және мүгедек бала тәрбиелеп отырған отбасыларға берілген. Енді баспана кезегінде тұрғандардың барлығы алады. Олар:

• жетім балалар;
• I және II топ мүгедектері; зейнеткерлер;
• ҰОС ардагерлері және оларға теңестірілгендер;
• мемлекеттік, қоғамдық немесе әскери тапсырма орындау кезінде қаза болғандардың отбасылары;
• экологиялық апат кезінде, табиғи немесе техногендік ТЖ кезінде баспанасынан айырылғандар;
• бөтен елдердің аумағында ұрысқа қатысқандар; "Алтын алқа", "Күміс алқа" иегері немесе ертеде "Батыр ана" атағын алған көпбалалы аналар;
• I және II дәрежелі "Ана даңқы" орденімен марапатталғандар.