|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Соңғы уақытта елорда маңында орналасқан күлгін түсті Көбейтұзға қатысты ақпарат көп. Instagram желісінде екі күн бұрын Көбейтұз көлінің тұзы 5 мың теңгеден саудаланып, адамдардың тұзды шелектеп әкетіп жатқаны тарады. Ал бүгін көлдің жалға берілетіні жайлы ақпарат шықты. Бірнеше сағаттан кейін Ақмола облысының Табиғи ресурстар және табиғатты пайдалануды реттеу басқармасы аталған нысанды жалға бермейтінін хабарлады.
Көбейтұзға қатысты жағдай әлеуметтік желілерде мемлекет пен қоғамға қатысты түрлі пікірлердің жариялануына себеп болды. Назарларыңызға мәдениет пен тұрмыстың байланысын шебер көрсеткен Әмірхан Омаровтың пікірін ұсынамыз.
«Еліміздегі түрлі ақпарат көздеріне сүйенсек, Қазақстан халқының 90 пайызы 100 мың теңге немесе одан да аз жалақы алады. Бұл дегеніміз 200-250 доллар. Қазақстандықтар табысының жартысын тамаққа жұмсайды. Мысалға алатын болсақ, Батыс Еуропада халық табысының 10-12%-ын азық-түлікке жұмсаса, Шығыс Еуропа тұрғындары жалақының 20-25%-ын ғана жұмсайды.
Елімізде халық табысының қалған жартысы жалдамалы пәтерге, коммуналдық қызметтер мен киім-кешекке кетеді. Өзін сапалы білім мен медицина қызметімен қамтамасыз етуге қарапайым қазақстандықтың қаржылық мүмкіндігі жоқ. Ал қазіргі індет жағдайындағы емханаларда орын жетіспеуі, дәрілер мен медициналық заттардың жоқтығы тіпті қиын. Егер адам коронавирус жұқтырса, дәрі-дәрмектер, дәрігер кеңесі мен мейірбике қызметін есептегенде бір аптадағы емдеу құны кем дегенде 80-100 мың теңгені құрайды.
Ал мемлекет жолыңыз болған жағдайда 42 500 теңге көлемінде жәрдемақы береді. Бірақ бұл сома шығындардың жартысын да жаппайды. Мұны не үшін айтып отырмын? Себебі адамдардың табиғатқа аяушылық танытуға, экологияны ойлауға, әйелдер құқығын қорғауға және әлемнің алға қоятын басты проблемаларына бас қатыруға уақыттары жоқ. Бұл сұрақтар маңызды, бірақ адамның негізгі қажеттіліктері шешілген соң ғана.
Бір қарағанда мәдениет пен табыс деңгейінің арасында тікелей байланыс жоқ сияқты көрінуі мүмкін. Бірақ кіріс деңгейі дамыған елдер қашанда жоғарыда аталған мәселелерге көбірек мән береді. Егер Көбейтұздағы жағдайды талқылайтындай ақылды әрі саналы болсақ, алдымен қазақстандықтардың орташа кірісін арттыру тетіктерін ойластырайық».
Соңғы кезде қызу талқыға түсіп жүрген Көбейтұздағы мәселенің маңызды екені рас. Алайда Әмірхан Омаров айтпақшы, күнкөріс деңгейімізді көтермей тұрып, қоршаған орта жағдайына жеткілікті дәрежеде мән бере алмайтынымыз да ащы шындық. Себебі «Сананы тұрмыс билейді», ал тұрмысты түзеу өз қолымызда.
Тағы көру
