Жаңалықтар

Неге қазақ наурыздың әр күніне атау қойып, мағынасына мән берген?

15.03.2023

1 мин

0

1316

Жыл бастауын қаңтар емес, наурыз деп атауының астарында терең философия жатқанын қазақ ертеден білген. Қыстың қаһарынан аман шығып, күн жылынып, бәйшешек атқанда бір-бірін бауырына басып, амал тойлаған.

Сол себепті қазақ халқы 9 күн бойы 14-22 аралығында Наурыз мерекесін атап өткен.

14-наурыз – Қауышу күні. Бұл күн – батыс өңірлерде әлі күнге дейін сақталған көрісу амалы. Ал Шығыста «амал көже» деген ұғыммен тойланады. Бұл күні ағайын-тума, көрші-жұрт бір-бірінің үйіне барып, аман-саулық сұрасқан.

15-наурыз – Тағзым күні. Ата-баба, қайтқан туыстың рухына құран бағыштап, жеті шелпек пісірген.

16-наурыз – Алас күні. Жағымсыз энергиядан арылу мақсатында адыраспан жағып, өз-өзін, маңайын аластап, тазару ғұрпын жасаған.

17-наурыз – Шаттық күні. Ауыл адамдары жиналып, ойын-сауық құрған.

18-наурыз – Өніс күні. Бұл күні ата-бабаларымыз жарлы, жетім мен жесірлерге қайырымдылық жасап, жаңа-жылға дейін игі істер жасаған.

19-наурыз – Береке күні. Табиғаттың жаңаруы ғана емес, өсіп-өнудің күні болғандықтан төлдеу мен гүлдеудің өзіне атау берген. Ұлыс күні туған төлге «Наурызтөл», гүлді «Наурызшешек» деп атаған.

20-наурыз – Жайнау күні. Бұл күні қазақ халқы жаңа киімдерін киіп, үй ішін жаңартып, тазалап қоятын болған.

21-наурыз – Үйлесім күні. Күн мен түн теңеліп, бір-бірімен гармонияға (үйлесімділікке) келген күн деп санаған.

22-наурыз – Ұлыс күні. Жаңа жылы, ұлы мереке болып, дүркіретіп тойланған төре мейрам болып саналады.

Фото: dknews.kz