Жаңалықтар

Шалғай өңірлерге жол ашылады: үш жаңа әуежай құрылысы жүріп жатыр

15.04.2026

мин

0

223

Сурет: Егемен Қазақстан

Елімізде туристік аймақтарға арналған үш әуежай іске қосылады, — деп хабарлайды Dauletten.kz. 

Қазақстанда туристік әлеуетті арттыру мақсатында бірқатар ірі жобалар қолға алынған. Соның ішінде елдің бірнеше өңірінде жаңа әуежайлар салу жұмыстары белсенді жүріп жатыр.

Шығыс Қазақстан облысындағы Катонқарағай мен Зайсан аудандары және Маңғыстау өңіріндегі Кендірлі демалыс аймағы әуе қатынасы арқылы қолжетімді болмақ. Бұл жобалар толық іске қосылғанда, аталған туристік бағыттарға бару айтарлықтай жеңілдейді.

Жобаның жалпы инвестициялық құны 117,7 миллиард теңгені құрайды. Мамандардың айтуынша, жаңа әуежайлар ішкі және сыртқы туристер ағынын арттырып, өңірлердің экономикалық дамуына да серпін береді.

Сонымен қатар, авиация саласында жолаушыларға қызмет көрсету сапасын жақсарту мақсатында әуе паркін жаңарту жұмыстары жүргізілуде. Алдағы жоспарға сәйкес, 2026 жылдың соңына дейін 9 жаңа ұшақ сатып алу көзделген.

Жыл басынан бері соның бір бөлігі орындалып, үш әуе кемесі елге жеткізілді. Оның ішінде Air Astana бір ұшақты, SCAT Airlines екі ұшақты пайдалануға енгізді.

Бұл өзгерістер жолаушылар тасымалының артуына да ықпал етуде. Соңғы деректерге сәйкес, биылғы алғашқы үш айда елдегі жалпы көлік қызметтерін пайдаланған жолаушылар саны 9,3 пайызға өсіп, 483,7 миллион адамға жеткен.