|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Талғардағы 16 жастағы Шерзат Полаттың өліміне байланысты әлеуметтік желілерде тараған тексерілмеген ақпараттарға байланысты мәжіліс депутаттары Абзал Құспан мен Ұнзила Шапақ өңірдегі құзырлы орган өкілдерімен кездесіп, іс бойынша 170-тен астам куәгерден жауап алынғанын анықтады, - деп хабарлайды Dauletten.kz.
Депутаттар Алматы облысының прокуроры Берік Адамов және облыс полиция департаментінің басшысы Мейрам Абикеевпен кездесті. Абзал Құспан Алматы облысына арнайы барып, істің барысы туралы толық ақпарат алғанын айтты.
Талғардағы Шерзат Полаттың өліміне қатысты соңғы күндері қоғамда қызу пікірталас жүріп жатқаны белгілі. Әлеуметтік желілерде әртүрлі тексерілмеген ақпараттар таралуына байланысты көп жағдайда эмоцияға толы жазбалар мен бейнемазмұндарға назар аударылды. Заңгер ретінде, бұл күрделі жағдайларды құқықтық тұрғыда талқылаудың маңыздылығын атап өткім келеді. Мұндай істерде қоғам тарапынан жасалған қысым тергеу амалдарының объективті әрі жан-жақты жүргізілуіне кедергі келтіруі мүмкін, – деді Абзал Құспан.
Ол сондай-ақ 40-қа жуық сараптама тағайындалып, тергеудің жан-жақты жүріп жатқанын айтты. Сонымен қатар Нұрғанат Ғайыпбаевтың өліміне де қатысты пікір білдірді.
Прокуратураның ресми ақпаратына сәйкес, қасақана кісі өлтіру күдігімен 11 адам ұсталғаны белгілі. Қазір тергеу амалдары жүргізілуде. Осы іс бойынша 170-тен астам куәгерден жауап алынып, 40-қа жуық сараптама тағайындалып, тергеу терең әрі жан-жақты жүргізіліп жатыр. Шерзат Полаттың ағасы Нұрғанат Ғайыпбаевтың өлімі Бас прокуратура мен ішкі істер министрлігінің бақылауында екенін атап өткен жөн. Оған қатысты сот-медициналық сараптама жүргізіліп жатыр. Қылмыстық істің қоғамдық маңызына байланысты мен тергеу барысымен танысып, заңгер ретінде мән-жайды нақты анықтау үшін жұмыс істеп жатырмын. Бұл істің әділ әрі ашық қаралуына ықпал ету – басты мақсатымыз, – деді Абзал Құспан.
Абзал Құспанның айтуынша, облыс прокуроры Берік Абызбайұлы кездесу барысында бұл істің құқықтық және әділдік принциптеріне сай қаралатынын атап, уәде берген.
- Алдағы уақытта тергеу барысы мен ресми ақпараттарды жариялап отырамын. Қазір расталмаған ақпараттардан аулақ болуға және ресми дереккөздерге сүйенуге шақырамын. Заңның үстемдігі мен әділдік жолында бірге болайық, – деп түйіндеді депутат.
