|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Шығыс Қазақстан облысы экология департаменті басшысының орынбасарына қатысты сот үкімін жариялады. Оның аса ірі көлемде пара алғаны дәлелденді, - деп хабарлайды Dauletten.kz.
Облыстық соттың мәліметінше, Өскемен қаласының №2 соты Қазақстан Экология, геология және табиғи ресурстар министрлігінің Экологиялық реттеу және бақылау комитетінің ШҚО экология департаменті басшысының орынбасары, азамат Т.-ға қатысты қылмыстық істі қарады. Оған ірі көлемде пара алу айыбы тағылды.
ШҚО экология департаменті азаматтардың өтініштері негізінде азамат Т.-ның жетекшілігімен алтын өндіру фабрикасында (АӨФ) экологиялық заңнама талаптарының сақталуын тексерген. Тексеру кезінде құрылыс мерзімдері бойынша жобалық шешімдерден ауытқулар анықталып, бұл бұзушылықтар кәсіпорынның қызметін тоқтата тұруға негіз болған.
Сотта белгілі болғандай, азамат Т. 2023 жылдың мамыр айында АӨФ-ты әкімшілік жауапкершілікке тартпау және тексеру нәтижелері бойынша оң шешім шығару үшін ЖШС директоры азамат С.-дан 30 000 АҚШ долларын (сол кездегі бағам бойынша 13 326 600 теңге) пара ретінде алған.
Кінәсі заттай дәлелдемелермен, 6 970 000 теңге көлеміндегі ақшалай қаражатпен, куәгерлердің айғақтарымен, жасырын тергеу нәтижелерімен және сараптама қорытындыларымен дәлелденді.
Прокурор айыпталушы Т.-ға бас бостандығынан айыру жазасын тағайындауды сұрады. Алайда, айыпталушы кінәсін мойындамай, өзін ақтауды өтінді.
Қылмыстық кодекстің 366-бабы 3-бөлігінің 3-тармағы бойынша бұл қылмыс үшін 7 жылдан 12 жылға дейін бас бостандығынан айыру немесе айыппұл жазасы қарастырылған. Сот азамат Т.-ның жасаған қылмысын ауырлататын мән-жай ретінде қабылдаған антын бұзғанын есепке алды, ал асырауындағы бес баласы жеңілдететін жағдай деп танылды.
Қылмыстың ауырлығын ескере отырып, сот азамат Т.-ны мемлекеттік қызмет атқару құқығынан өмір бойына айыра отырып, 7 жылға бас бостандығынан айыру жазасын тағайындады.
Еске сала кетейік, сыбайлас жемқорлыққа қатысты аса ауыр қылмыс жасаған тұлғалар мерзімінен бұрын шартты түрде босатылмайды. Үкім әлі заңды күшіне енген жоқ.
