Жаңалықтар

Тоқаев Кипр президентімен маңызды мәселелерді талқылады

03.06.2026

мин

0

94

Сурет: Ақорда

Тоқаев пен Кипр президенті екіжақты ынтымақтастықты талқылады, — деп хабарлайды Dauletten.kz. 

Ақордада Қазақстан Президенті Қасым-Жомарт Тоқаев пен Кипр Президенті Никос Христодулидис шағын құрамда келіссөз өткізді. Тараптар екі ел арасындағы ынтымақтастықтың қазіргі жай-күйі мен болашақ бағыттарын талқылады

Қазақстан Президенті Қасым-Жомарт Тоқаев Кипр Президенті Никос Христодулидиспен шағын құрамда кездесу өткізді.

– 2019 жылы Сыртқы істер министрі лауазымын атқарып жүргеніңізде елімізге келіп, Қазақстанның Еуропа Одағындағы сенімді досы әрі қолдаушысы ретінде әрекет ететініңізді мәлімдеген едіңіз. Бүгінде біз айтарлықтай нәтижеге қол жеткіздік деп сеніммен айтуға болады. Мемлекеттеріміздің астаналарында елшіліктерімізді аштық. Екі ел арасында тікелей әуе рейсі іске қосылды, басқа да бірқатар маңызды жоба жүзеге асырылды. Дегенмен екіжақты ықпалдастықты кеңейту үшін әлеуетіміз жеткілікті деп ойлаймын. Өз тарапымнан көптеген бағытта ынтымақтастығымызды одан әрі дамытуға күш салуға дайынмын, — деді Мемлекет басшысы.

Өз кезегінде Никос Христодулидис Қазақстанға Кипрден ашылған тікелей рейспен келгенін атап өтті. 

 – Сіздің еліңізге Кипрден тікелей қатынайтын алғашқы рейс арқылы іскерлік делегация өкілдерімен бірге ұшып келгеніме өте қуаныштымын. Елдеріміздің әлеуеті мол. Бүгінгі келіссөздер өзара ынтымақтастықты арттыруға септігін тигізеді деп санаймын. Сондай-ақ Қазақстанға басқа лауазымда келіп отырмын. Қазіргі уақытта еліміз Еуропа Одағы Кеңесіне төрағалық етіп жатыр. Аталған өңірдің маңызын және Қазақстанның ерекшеліктерін ескере отырып, Еуропа Одағы мен Қазақстан арасындағы ықпалдастықты одан әрі ілгерілету жолдарын талқылауға әзірмін.