|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Мемлекет басшысы Қасым-Жомарт Тоқаев теңізге шығар жолы жоқ дамушы елдерге арналған Біріккен Ұлттар Ұйымының үшінші конференциясында сөз сөйледі, - деп хабарлайды Dauletten.kz Ақордаға сілтеме жасап.
Президент алдымен конференцияны өткізу бастамасын көтергені үшін Түрікменстан Президенті Сердар Бердімұхамедовке алғыс білдіріп, теңізге шыға алмайтын дамушы елдердің мәселелерін шешуге және мүмкіндіктерін пайдалануға ниет білдіргені үшін БҰҰ Бас хатшысы Антониу Гутеришке ризашылығын жеткізді.
- Жиырма жылдан астам уақыт бұрын Қазақстан Теңізге шығар жолы жоқ дамушы елдерге арналған БҰҰ-ның алғашқы конференциясын өткізіп, жетекші рөл атқарды. Содан бері еліміз бұл маңызды үдеріске белсене қатысып келеді. Осы тарихи оқиға кезінде Алматы іс-қимыл бағдарламасы қабылданды. Бұл құжат теңізге шыға алмайтын дамушы елдер тобының проблемаларын алғаш рет жаһандық даму күн тәртібіне шығарды. Бүгін біз осы міндеттерді одан әрі ілгерілету мақсатында Авазада жиналып отырмыз, – деді Мемлекет басшысы.
Президент өңірлік мәселелер жөнінде пікір білдіре отырып, елдердің мүмкіндіктері тек географиямен шектелмейтінін Орталық Азия мысалы дәлелдеп отырғанын атап өтті.
- Қазіргі таңда теңізге шығатын жолымыз жоқ болса да, болашақта бұл мәселені шешудің жолын табамыз. Құрлық арқылы байланыс орнатудың маңызы артып келеді. Біздің өңірдің әлеуметтік-экономикалық дамуы тұрақты. Саяси ерік-жігер, стратегиялық инвестициялар мен халықаралық серіктестіктің арқасында теңізге тікелей шығатын жолдың болмауы кедергі емес, керісінше жаңа мүмкіндіктерге жол ашады. Бүгінде Орталық Азия өзара тиімді ықпалдастық кеңістігіне айналып отыр. Өңір сауда, инвестиция, көлік, байланыс және ресурстарды тиімді басқару салаларында зор әлеуетке ие. Екі күн бұрын Қазақстан мен БҰҰ арасында Орталық Азия мен Ауғанстанға арналған орнықты даму мақсаттары жөніндегі өңірлік орталық құру туралы келісімге қол қойылды. Оның штаб-пәтері Алматыда орналасады. Бұл – бүкіл аймақ үшін маңызды жетістік әрі Аваза бағдарламасының мақсаттарымен үйлеседі, – деді Қасым-Жомарт Тоқаев.
Сөзінің соңында Мемлекет басшысы Қазақстанның теңізге шыға алмайтын дамушы елдер тобының мақсаттары мен қағидаттарын толық қолдайтынын нақты айтты.
- Теңізге шығатын жолы жоқ дамушы елдердің жаһандық күн тәртібінен шет қалмауы халықаралық серіктестікті нығайту арқылы ғана қамтамасыз етіледі, – деді Президент.
