Жаңалықтар

Үздік әскери түлектерге аға лейтенант шені беріле бастайды

22.05.2026

мин

0

122

Сурет: BAQ.kz

Енді оқуын жоғары нәтижемен аяқтаған курсанттар қызмет жолын бірден жоғары әскери шенмен бастайды, — деп хабарлайды Dauletten.kz. 

Елімізде әскери және арнаулы оқу орындарының үздік бітірушілеріне қосымша мүмкіндік қарастырылды. Жаңа ережеге сәйкес, оқу үлгерімі жоғары болған түлектерге бұрынғыдай «лейтенант» емес, бірден «аға лейтенант» атағы табысталады.

Бұл талап Қазақстан аумағындағы әскери жоғары оқу орындарымен қатар, шетелде білім алған үздік курсанттарға да қолданылады. Сонымен бірге, оқу озаттарына болашақ қызмет орнын таңдауда артықшылық беріледі.

Жаңартылған тәртіп Президент бекіткен мемлекеттік қызметке қатысты заң аясында енгізілген. Сондай-ақ әскери қызмет өткеру қағидаларына тиісті толықтырулар енгізу көзделген.

Жаңа өзгеріс әскери салада білім сапасын арттыруға және курсанттардың оқу барысында жоғары нәтиже көрсетуіне ынталандыру тетігі ретінде қарастырылып отыр.