Қаржылық сауат

Банк картасы жайлы не білесіз?

22.05.2020

1 мин

74

17745

Біз банк картасын күнделікті пайдаланамыз. Қолма-қол төлем жасағаннан гөрі, дәл осы банк картасын пайдалану бәріміз үшін ыңғайлы әрі жылдам. Тіпті қазір екінің бірі банк картасы арқылы төлем жасағанды жөн көреді. Десе де, банк карталары жайлы біз білмейтін жайттар аз емес.

Картаның басты беті: ​

Карта 16 таңбалы нөмірден тұрады. Бірінші сан - төлем жүйесі. Дәл осы алғашқы нөмір арқылы карта түрін анықтауға болады (4 - VISA, 5 - MasterCard). Кезекті 5 нөмір – банк идентификаторы, яғни картаның қайдан, қай банктен шыққанын және ондағы төлем жүйесі жазылады. Ал соңғы 9 таңбада карта иесі жайлы нақты мәліметтер жинақталады.

Картаның артқы беті:

Картаның артқы жағында сіздің ақшаңыздың қауіпсіздігінің тағы бір кепілі - CVV немесе CVC коды болады. Бұл өзіндік PIN-код, тек интернеттегі операцияларға арналған, яғни кодты интернетте төлем жасау үшін ғана қолданасыз. Мұны да төлем картасының басқа реквизиттері сияқты ешкімге жариялауға болмайды.

Банк картасына байланысты бірнеше ережені есте сақтаған абзал:

1. Картаңызды және PIN-кодты танымайтын жандарға тіпті жақындарыңызға, достарыңызға сеніп тапсырмағаныңыз дұрыс. Кей жағдайда картаның суретін желі арқылы жіберіп жататындар бар. Ол өте қауіпті екенін есте сақтаңыз;
2. PIN-кодты терген кезде, банкоматтың немесе POS-терминалдың клавиатурасын алақаныңызбен жабыңыз, себебі бөгде жандар немесе камера болуы әдбен мүмкін;
3. Банк қызметкерлері сіздің картаныңызда көрсетілген реквезиттерді сұрау үшін ешқашан хабарласпайды. Сол себепті өзіңіздің 16 таңбалы карта нөмірін, CVV кодты және парольді айтуға болмайды;
4. Карта жоғалған жағдайда банк қосымшасы арқылы, немесе банк қызметкеріне хабарласу арқылы барлық операцияларды тоқтатып, бұғаттаңыз;
5. Қауіпсіздік үшін, PIN-кодты өз қалауыңыз бойынша ауыстырсаңыз болады. Алайда, «5555», «1234» сияқты жеңіл жатталатын пароль қоймағаныңыз абзал.

Назерке БАЙЖАН