Жаңалықтар

Еңбек министрлігі ең жоғары жалақы төленетін мамандықтарды атады

16.07.2026

мин

0

408

Сурет: BAQ.kz

Қазақстанда жұмыс іздеушілер саны бос жұмыс орындарынан асып түсті. Еңбек нарығында вакансия көбейгенімен, жоғары жалақы ұсынатын қызметтер саусақпен санарлық. Ал қазақстандықтардың жалақыға деген талабы жұмыс берушілердің мүмкіндігінен әлдеқайда жоғары болып отыр, — деп хабарлайды Dauletten.kz.

Маусым айында Enbek.kz электронды еңбек биржасында еңбек нарығы қайта жанданды. Еңбек және халықты әлеуметтік қорғау министрлігінің мәліметінше, жұмыс берушілер 108,7 мың бос жұмыс орнын жарияласа, жұмыс іздеушілер 126,7 мың түйіндеме орналастырған. Бұл еңбек нарығында бәсекенің әлі де жоғары екенін көрсетеді.

Ең көп маман қажет болған сала – білім беру. Мұнда 19,2 мың бос жұмыс орны жарияланған. Одан кейін қызмет көрсету, ауыл шаруашылығы, денсаулық сақтау, құрылыс және өңдеу өнеркәсібі келеді. Бұл мемлекетке ең қажет мамандардың басым бөлігі әлеуметтік және өндірістік бағытта екенін аңғартады.

Бір қарағанда, бос жұмыс орны жеткілікті сияқты көрінеді. Алайда олардың тек төрттен бірі ғана жоғары білікті мамандарға арналған. Қалғанының басым бөлігі орта немесе төмен білікті қызметкерлерге ұсынылған. Демек, жоғары табыс әкелетін қызметтердің саны әлі де шектеулі.

Ең жоғары жалақы ұсынған вакансиялар арасында дивизион директорының айлығы шамамен 1,98 миллион теңгеге дейін жетеді. Басқарма басшысының орынбасарына – 1,38 миллион теңге, ал ұңғыма инженеріне 1,31 миллион теңге көлемінде еңбекақы ұсынылған.

Ал жұмыс іздеушілердің күткені бұдан да жоғары. Ұшқыштар орта есеппен 3,4 миллион теңге жалақы алғысы келеді. Жүйелік сәулетшілер 2,5 миллион теңге, ал хирург-дәрігерлер шамамен 2 миллион теңге жалақы күтетінін көрсеткен.

Еңбек нарығындағы тағы бір маңызды үрдіс – жастардың белсенділігі. Барлық түйіндеменің 49 пайызы 35 жасқа дейінгі азаматтарға тиесілі. Бұл оқуын енді аяқтаған түлектердің еңбек нарығына жаппай шығуымен байланысты. Алайда тәжірибесі аз мамандар саны артқан сайын, лайықты жалақыға талас күшейе түседі.

Өңірлер бойынша ең көп бос жұмыс орны Түркістан облысында тіркелді. Кейінгі орындарда Астана, Жамбыл және Қарағанды облыстары тұр.

Маусым қорытындысы еңбек нарығындағы тағы бір шындықты көрсетті: Қазақстанда жұмыс орындары көбейгенімен, миллиондық жалақы ұсынатын қызметтер өте аз. Сондықтан еңбек нарығындағы басты мәселе жұмыс саны емес, жоғары табыс әкелетін сапалы жұмыс орындарының тапшылығы болып қала береді.