|
|
|
| Товарные рынки | ||
| BID | ASK | |
| Brent | 0.00 | 0.00 |
| Лайт | 0.00 | 0.00 |
Ұлттық банк Ақша-кредит саясаты комитеті базалық мөлшерлемені 16,5% деңгейінде белгілеу туралы шешім қабылдады. Бұл шешім нақты деректер, жаңартылған болжамдар және инфляциялық тәуекелдердің теңгерімін бағалау нәтижесінде қабылданды, - деп хабарлайды Dauletten.kz.
Ұлттық банк мәліметінше, елдегі баға өсімі жоғары қарқынмен жалғасуда. Бұл ақша-кредит саясатын айтарлықтай жұмсартуға негіз береді. Сондықтан инфляцияның өсу қаупін төмендету үшін пәрменді шаралар қажет.
- Инфляцияның барлық көрсеткіштері өсіп келеді. Жылдық инфляция ақпанда 9,4%-ға дейін жеделдеді. Барлық негізгі компоненттер бойынша бағаның өсу қарқыны артқан. Әсіресе қызметтер бағасының қымбаттауы айтарлықтай ықпал етуде. Ақпанда айлық инфляция орташа тарихи көрсеткіштен едәуір асып түсті. Базалық және маусымдық факторлардан тазартылған инфляция деңгейі бір жылдық есепте 14,2% және 16,9%-ды құрады. Сонымен қатар тұтынушылық несие беру қарқыны (2024 жылдың қорытындысы бойынша 33,5% өсу) сұраныстың артуына ықпал етуде. Ақпан айында халықтың инфляциялық күтулері 13,7%-ға дейін көтерілді, – делінген хабарламада.
Сыртқы факторлар мен инфляцияға әсер
Ресейдегі инфляцияның жеделдеуі сыртқы сектордың бағаға ықпалын күшейтті. 2024 жылдың желтоқсанынан бастап әлемдік азық-түлік бағасы төмендей бастағанымен, әлі де жоғары деңгейде сақталып отыр. Жаһандық инфляция тұрақты сипатқа ие болып, геосаяси тәуекелдер де сақталуда. Бұл факторлар көптеген елдердің, соның ішінде Қазақстанның да қатаң ақша-кредит саясатын жалғастыруына негіз болуда.
- Базалық сценарий бойынша Brent маркалы мұнайдың орташа бағасы 2025 жылдың соңына дейін 70 АҚШ доллары деңгейінде сақталады. Бұл бағаның нақты динамикасы мен мұнай нарығындағы ұсыныстың сұраныстан артуын ескере отырып жасалған болжам. Инфляция 2025 жылы 10-12%, 2026 жылы 9-11% деңгейінде болжануда. Ал 2027 жылдың қорытындысы бойынша ақша-кредит саясатының қатаңдығы мен салық реформаларының әсерінен 5,5-7,5%-ға дейін төмендеуі күтіледі, – деп мәлімдеді Ұлттық банк өкілдері.
2025-2027 жылдарға болжам
Алдағы жылдары инфляцияға сыртқы инфляциялық қысымның күшеюі, жанар-жағармай бағасының өсуі, ҚҚС мөлшерлемесінің артуы және тұрғын үй-коммуналдық шаруашылық саласындағы реформалар әсер етуі мүмкін.
- Негізгі тәуекелдер – ішкі сұраныстың артуы, Ресейдегі инфляцияның жеделдеуі және инфляциялық күтулердің тұрақсыздығы. Сонымен қатар ЖЖМ бағасының нақты өсімі, фискалдық саясаттың қатаңдауы (Ұлттық қордан трансферттерді қысқарту жоспары) және реттелетін бағалардың көтерілуінен болатын ықтимал қосымша әсерлерге қатысты белгісіздік сақталуда, – деп атап өтті Ұлттық банк.
Айта кетейік, базалық мөлшерлеме – Ұлттық банктің ақша-кредит саясатын жүргізу құралдарының бірі. Ол екінші деңгейлі банктерге несие беру және депозиттерді қабылдау кезінде қолданылады. Ұлттық банк коммерциялық банктерге несиені дәл осы базалық мөлшерлеме бойынша береді және депозиттерді де осы ставкамен қабылдайды.
