Жаңалықтар

Алматылықтар 5%-дық ипотекаға өтінім бере алады

20.10.2026

мин

0

166

Сурет: gov.kz

Алматыда тұрғын үй кезегінде тұрған азаматтар жылдық 5 пайыздық мөлшерлемемен баспана алу мүмкіндігіне ие болады. «Қалқаман-2» тұрғын үй кешеніндегі пәтерлерге өтінім қабылдау 22 қазанда басталады. Бастапқы жарна кемінде 10 пайыз болуы керек, — деп хабарлайды Dauletten.kz.

Алматыда тұрғын үй кезегінде тұрған азаматтарға арналған жеңілдетілген ипотекалық бағдарлама аясында 600-ге жуық пәтер беріледі. Баспана Наурызбай ауданындағы Достық шағын ауданында орналасқан «Қалқаман-2» тұрғын үй кешенінен ұсынылады.

Пәтер алуға өтінімдер 22 қазаннан бастап қабылданады. Бір шаршы метрдің бағасы – 359 мың теңге. Тұрғын үйлердің ауданы 35 пен 79 шаршы метр аралығында болады.

Бағдарламаға қатысу үшін азаматтар тұрғын үйге мұқтаждар кезегінде тұруы қажет. Сонымен қатар «Отбасы банкте» жинақ шоты болуы және несие сомасының кемінде 10 пайызы көлемінде бастапқы жарна жинауы міндетті.

Ипотеканың негізгі шарттары:

Пайыздық мөлшерлеме: жылдық 5%;

Бастапқы жарна: кемінде 10%;

Несие мерзімі: 20 жылға дейін;

Пәтер ауданы: 35–79 шаршы метр;

Бір шаршы метрдің бағасы: 359 мың теңге.

Пәтерлердің 70 пайызы басым санаттағы азаматтарға, ал 20 пайызы жетім балалар мен ата-анасының қамқорлығынсыз қалған балаларға бөлінеді.

Қатысушыларды іріктеу 3 қарашада аяқталады. Сондықтан бағдарламаға қатысуды жоспарлаған азаматтар өтінім беру мерзімін ескергені жөн.